ԵՐԵՎԱՆ, 4 ապրիլի — Sputnik. Հանրության բոլոր հատվածների համար անվիճելի է, որ այս ընտրություններն անցկացվեցին ավելի բարձր մակարդակով, քան նախորդ տարիներին: Իր ֆեյսբուքյան էջում գրել է ՀՀ վարչապետ Կարեն Կարապետյանը:
Շնորհակալություն հայտնելով ընտրությանը մասնակցած ՀՀ բոլոր քաղաքացիներին՝ ակտիվ և պատասխանատու քաղաքացիական դիրքորոշումը դրսևորելու համար, Կարեն Կարապետյանն իր քաղաքական թիմի անունից խոստացել է ստեղծել «նոր Հայաստան»:
«Այն քվեն, որ ստացել է մեր թիմը, պարտավորեցնում է: Մենք հստակորեն գիտակցում ենք այն պատասխանատվությունը, որը ստանձնում ենք եւ հաստատակամ ենք ժողովրդի կողմից մեզ տրված փոփոխությունների մանդատը կյանքի կոչելու: Առջևում մեզ սպասվում է հետևողական եւ քրտնաջան աշխատանք: Անկասկած, անելիքները շատ են, սակայն մենք չենք վախենում դժվար ճանապարհից: Կարող են ամպագոռգոռ հնչել խոսքերս, բայց ասում եմ սրտիս խորքից: Խոսք եմ տալիս չխնայել ջանք ու եռանդ, որպեսզի ստեղծենք ՆՈՐ ՀԱՅԱՍՏԱՆ, որպեսզի մեր երկրի ամեն քաղաքացի իրեն ավելի լավ զգա, քան նախկինում»,- գրել է Կարեն Կարապետյանը:
