ԵՐԵՎԱՆ, 3 ապրիլի — Sputnik. Ռուսաստանի ԱԳՆ ղեկավար Սերգեյ Լավրովը մեկ անգամ ևս հաստատել է, որ Ռուսաստանը Լեռնային Ղարաբաղի կարգավորման ակտիվ մասնակից է։
«ԵԱՀԿ ՄԽ մյուս համանախագահների հետ համատեղ Ռուսաստանն աջակցում է կողմերին հակամարտության կայուն հաղթահարմանը հասնելու համար։ Այս խնդրի լուծմանն էր նվիրված անցյալ ամառ Ռուսաստանի նախագահի նախաձեռնությամբ Սանկտ Պետերբուրգում կազմակերպված եռակողմ գագաթնաժողովը», — ասել է ՌԴ ԱԳՆ ղեկավար Սերգեյ Լավրովը հայկական «Նովոյե վրեմյա» թերթում հրապարակած «Ռուսաստանն ու Հայաստանը`բարեկամության և վստահության բազմադարյա ավանդույթներ. դիվանագիտական հարաբերությունների 25-ամյակի առթիվ» հոդվածում։
Նա նշել է, որ Արցախի կարգավորման թեման առարկայական քննարկում է ունեցել նաև Վլադիմիր Պուտինի` Հայաստանի և Ադրբեջանի ղեկավարների հետ երկկողմանի հանդիպման ժամանակ, ինչպես նաև արտգործնախարարների բազմաթիվ հանդիպումների ընթացքում։
«Մի շարք հարցերի վերաբերյալ հաջողվում է պայմանավորվածություն ձեռք բերել, մի քանի հարց է մնացել, թերևս`ամենակարևորները։ Սակայն ակնհայտ է, որ աշխատանքի արդյունքները կախված են առաջին հերթին հենց կողմերի դրսևորած քաղաքական կամքից, ճկունություն դրսևորելու և փոխզիջումային լուծումների գնալու նրանց պատրաստակամությունից», — ասել է Լավրովը։
Ղարաբաղյան հակամարտությունը սրվել է 2016 թվականի ապրիլի 2-5–ն ընկած ժամանակահատվածում։ Երևանը հայտարարել էր, որ Ադրբեջանը նախահարձակ գործողություններ է սկսել, Բաքուն էլ իր հերթին հայտարարել էր, որ հայկական կողմն է կրակում Ադրբեջանի ուղղությամբ։ Պաշտոնական տվյալների համաձայն` հակամարտության երկու կողմն էլ զոհեր ունեցան, այդ թվում` խաղաղ բնակիչների շրջանում։
Ապրիլի 5-ին Մոսկվայի աջակցությամբ կողմերը պայմանավորվեցին դադարեցնել ռազմական գործողությունները, սակայն շփման գծում խախտումները շարունակվում են մինչ օրս։ Մայիսի 16-ին Վիեննայում կայացավ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի` հակամարտության թեժացումից հետո առաջին հանդիպումը, որին մասնակցեցին նաև ԵԱՀԿ Մինսկի խմբի համանախագահները։
Սարգսյան-Ալիև հանդիպմանը համանախագահող երկրների ներկայացուցիչները պնդեցին 1994թ.–ի զինադադարի և 1995թ.–ի զինադադարի ամրապնդման մասին համաձայնագրերի անշեղ իրագործման անհրաժեշտությունը: Համաձայնություն ձեռք բերվեց քայլեր ձեռնարկել դրանց իրականացման մշտադիտարկման և միջադեպերի հետաքննության մեխանիզմի ներդրման, ԵԱՀԿ գործող նախագահի անձնական ներկայացուցչի թիմի կարողությունների ավելացման, հակամարտության կարգավորման բանակցային գործընթացի հնարավոր վերսկսման ուղղությամբ։
