ԵՐԵՎԱՆ, 17 հունվարի — Sputnik. Ղարաբաղյան հիմնախնդրի կարգավորման թեման վերացական չէ և «բացառապես Ադրբեջանի ներքին գործերի թեման չէ», հայտարարել է Ռուսաստանի ԱԳՆ ղեկավար Սերգեյ Լավրովը։
Լավրովի խոսքով` ղարաբաղյան խնդրի վերաբերյալ կա մի շարք որոշում, որոնք ընդունվել են ՄԱԿ-ի Անվտանգության խորհրդում և ուղղված են եղել հակամարտության գոտում կրակի դադարեցմանը։
Լավրովը նշել է, որ ԵԱՀԿ Մինսկի խմբի բազմաթիվ որոշումներում, ինչպես նաև հայտարարություններում և փաստաթղթերում, որոնց տակ դրված են Հայաստանի և Ադրբեջանի նախագահների ստորագրությունները, ընդգծվում է ղարաբաղյան հակամարտության բացառապես խաղաղ կարգավորման անհրաժեշտությունը։
«Դրանցում ոչ երկիմաստորեն ասվում է վեճերի խաղաղ կարգավորման մասին», — նշել է Լավրովը։ Նա անհանգստություն է հայտնել 2016թ-ի ապրիլյան իրադարձությունների առնչությամբ` ընդգծելով, որ Ռուսաստանը որոշիչ դեր է խաղացել արյունահեղությունը դադարեցնելու մեջ։
Ղարաբաղյան հակամարտությունը սրվեց ապրիլի 2-5–ն ընկած ժամանակահատվածում։ Երևանը հայտարարեց, որ Ադրբեջանը նախահարձակ գործողություններ է սկսել, Բաքուն էլ իր հերթին հայտարարեց, որ հայկական կողմն է կրակում Ադրբեջանի ուղղությամբ։ Պաշտոնական տվյալների համաձայն` հակամարտության երկու կողմն էլ զոհեր ունեցան, այդ թվում` խաղաղ բնակիչների շրջանում։
Ապրիլի 5-ին Մոսկվայի աջակցությամբ կողմերը պայմանավորվեցին դադարեցնել ռազմական գործողությունները, սակայն շփման գծում խախտումները շարունակվում են մինչ օրս։ Մայիսի 16-ին Վիեննայում կայացավ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի` հակամարտության թեժացումից հետո առաջին հանդիպումը, որին մասնակցեցին նաև ԵԱՀԿ Մինսկի խմբի համանախագահները։
Սարգսյան-Ալիև հանդիպմանը համանախագահող երկրների ներկայացուցիչները պնդեցին 1994թ.–ի զինադադարի և 1995թ.–ի զինադադարի ամրապնդման մասին համաձայնագրերի անշեղ իրագործման անհրաժեշտությունը: Համաձայնություն ձեռք բերվեց քայլեր ձեռնարկել դրանց իրականացման մշտադիտարկման և միջադեպերի հետաքննության մեխանիզմի ներդրման, ԵԱՀԿ գործող նախագահի անձնական ներկայացուցչի թիմի կարողությունների ավելացման, հակամարտության կարգավորման բանակցային գործընթացի հնարավոր վերսկսման ուղղությամբ։
