ԵՐԵՎԱՆ, 2 ապրիլի — Sputnik. Ձայների 46%-ով առաջատար է իշխող ՀՀԿ-ն։ Այս մասին են վկայում «Երկիր մեդիա» հեռուստաալիքի պատվերով Baltic Surveys/The Gallup Organization կազմակերպության անցկացրած Exit-poll-ի տվյալները։
Exit poll հարցման արդյունքների համաձայն` Հայաստանի խորհրդարան են անցնում չորս կուսակցություն` ՀՀԿ-ն, «Ծառուկյան» դաշինքը, «Ելք»-ն ու ՀՅԴ-ն։ Հարցման տվյալներով` երկրորդ տեղում է «Ծառուկյան» դաշինքը, երրորդ տեղում` «Ելք»-ը, չորրորդում` ՀՅԴ-ն։ 19 130 ընտրողների շարքում հարցումն անցկացրել են 300 սոցիոլոգներ։
Հայկական սոցիոլոգիական ընկերակցության նախագահ Գևորգ Պողոսյանի ներկայացված տվյալներով՝ Հայաստանի Հանրապետական կուսակցությունն ունի 46 տոկոս, «Ծառուկյան դաշինքը»` 25 տոկոս, «Օհանյան-Րաֆֆի —Օսկանյան» դաշինքը՝ 3 տոկոս, «Կոնգրես- ՀԺԿ»–ն՝ 3 տոկոս, «Ելք» դաշինքը՝ 10 տոկոս, Հայ Յեղափոխական Դաշնակցությունը՝ 5 տոկոս, «Ազատ դեմոկրատները»՝ 2 տոկոս, «Հայկական վերածնունդ» կուսակցությունը՝ 4 տոկոս, Հայաստանի կոմունիստական կուսակցությունը՝ 2 տոկոս։
Հարցվածների 2 տոկոսը չի պատասխանել հարցմանը:
Հարցումներն անցկացվել են 13 ընտրատարածքների բոլոր 125 ընտրատեղամասերում։
Ընտրություններին մասնակցում է ինը քաղաքական ուժ` հինգ կուսակցություն և չորս դաշինք` Հայաստանի Հանրապետական կուսակցությունը, Կոմունիստական կուսակցությունը, Հայ Յեղափոխական Դաշնակցությունը, «Ազատ դեմոկրատներ» կուսակցությունը, «Հայկական վերածնումդ» կուսակցությունը և «ԵԼՔ», «Հայ ազգային կոնգրես», «Օհանյան-Րաֆֆի-Օսկանյան», «Ծառուկյան» դաշինքները։
