ԵՐԵՎԱՆ, 2 ապրիլի — Sputnik. Այսօր, տեղական ժամանակով ուղիղ 20։00-ին կփակվեն ՀՀ տարածքում գործող բոլոր ընտրատեղամասերը։ Նման դրույթ է ամրագրված ՀՀ ընտրական օրենսգրքում: Նույն օրեքի համաձայն, սակայն, մինչև 20:00 ընտրատեղամաս մտած, բայց դեռ չքվեարկած ընտրողներին հանձնաժողովը պետք է քվեարկելու իրավունք տա:
Ձայների հաշվարկի տվյալները գրանցվում են համապատասխան տեղեկանքում, որի մեկական օրինակը տրամադրվում է վստահված անձանց և դիտորներին: Նրանք նաև իրավունք ունեն այն տեսա կամ լուսանկարահանելու: Իսկ ընտրողների ցուցակները կարող են միայն ուսումնասիրվել, դրանք պատճենահանելու, լուսանկարահանելու կամ տեսանկարահանելու իրավունք օրենքը չի սահմանում:
Կենտրոնական ընտրական հանձնաժողովը տարածքային ընտրական հանձնաժողովներից ստացված քվեարկությունների արդյունքները պետք է հրապարակի քվեարկության ավարտից ոչ ուշ, քան 24 ժամ հետո, վերջնական արդյունքները` ընտրությունների ավարտից 7 օր անց, երբ կամփոփվեն բողոքների հիման վրա կատարված վերահաշվարկների արդյունքները։
Ազգային ժողովի պատգամավորների նվազագույն թիվը նոր օրենսգրքով 101 է:
Ընտրություններին մասնակցում է ինը քաղաքական ուժ` հինգ կուսակցություն և չորս դաշինք` Հայաստանի Հանրապետական կուսակցությունը, Կոմունիստական կուսակցությունը, Հայ Յեղափոխական Դաշնակցությունը, «Ազատ դեմոկրատներ» կուսակցությունը, «Հայկական վերածնումդ» կուսակցությունը և «ԵԼՔ», «Հայ ազգային կոնգրես», «Օհանյան-Րաֆֆի-Օսկանյան», «Ծառուկյան» դաշինքները։
