ԵՐԵՎԱՆ, 31 մարտի — Sputnik. Համաշխարհային ճանաչում ունեցող երաժիշտ Սերժ Թանկյանը, ռեժիսոր Ատոմ Էգոյանը, դերասանուհի Արսինե Խանջյանը, կինոռեժիսոր-սցենարիստ Էրիկ Նազարյանը տարբեր դիտորդական խմբերի կազմում կմասնակցեն ՀՀ-ում նախանշված առաջիկա խորհրդարանական ընտրություններին։ Այս մասին այսօր լրագրողների հետ հանդիպման ժամանակ ասաց հայտնի կանադահայ ռեժիսոր Ատոմ Էգոյանի կինը, դերասանուհի Արսինե Խանջյանը։
Խանջյանն ու իր գործընկերները դիտորդների համար նախատեսված հատուկ թրեյնինգներ են անցել, որոնք կօգնեն նրանց արագ կողմորոշվել և ադեկվատ արձագանքել ընտրախախտումներ հայտնաբերելու ժամանակ։
«Ժամանակն է ընտրություններին նոր մոտեցում ցուցաբերել։ Մենք «շրջիկ» դիտորդներ ենք լինելու», — ավելացրեց նա։
Կանադահայ ռեժիսոր Ատոմ Էգոյանն իր հերթին ասաց, որ շատ է սիրում Հայաստանը և հին ու դիմացկուն հայ ժողովրդին։
«Ապրիլի 2-ին մասնակցեք ԱԺ ընտրություններին, տեր կանգնեք ձեր ձայնին։ Եթե կիրակի դուք չմասնակցեք ընտրություններին, ինքներդ ձեզ կվնասեք», — նշեց Էգոյանը։
Նա ավելացրեց, որ սփյուռքի իր հայրենակիցների հետ Հայաստան է ժամանել կոնկրետ առաքելությամբ` պահպանել ընտրողների ձայներն ու սատարել «հրաշալի երիտասարդ թեկանծուներին, որոնք կարող են փոխել Հայաստանը»։
Խորհրդարանական ընտրությունները կանցկացվեն ապրիլի 2-ին: 2015 թվականին ընդունված Սահմանադրական փոփոխություններից հետո սա առաջին համապետական ընտրությունն է, որով նախատեսվում է անցում կատարել կառավարման խորհրդարանական համակարգին` երկրի ներկայիս ղեկավարի իրավասությունների ժամկետի ավարտից՝ 2018 թվականից հետո:
