ԵՐԵՎԱՆ, 31 մարտի — Sputnik. ԵԱՀԿ գործող նախագահ, Ավստրիայի արտգործնախարար Սեբաստյան Կուրցն այսօր միացել է Լեռնային Ղարաբաղի հակամարտության կողմերին ուղղված՝ քաղաքական կարգավորման գործընթացին ակտիվ մասնակցությունը վերսկսելու ԵԱՀԿ Մինսկի խմբի համանախագահների կոչին։ Այս մասին գրում է ԵԱՀԿ-ի կայքը:
Նա նշել է, որ մեկ տարի առաջ Լեռնային Ղարաբաղում տեղի ունեցած բախումներն ու բռնությունը վերջին երկու տասնամյակի ընթացքում ամենավատն էին, դրանք ավերածությունների, տանջանքների և մարդկային կորուստների պատճառ են դարձել:
«Լավ եմ հիշում, թե որքան արագ պատերազմի մեխանիզմը կարող է հարված հասցնել խաղաղության համար գործադրվող ջանքերին: Դրա համար մենք կոչ ենք անում բոլոր կողմերին հետ կանգնել ցանկացած գործողությունից, որը վտանգի տակ է դնում հրադադարի ռեժիմը: Կողմերը պետք է կատարեն իրենց հանձնառությունները` միջազգային մարդասիրական պարտավորությունները խստորեն պահպանելու հարցում. ռազմական հանցագործությունները երբեք չեն կարող արդարացվել»,- ասել է Կուրցը:
Վերհիշելով շփման գծում 2016 թվականի ապրիլին տեղի ունեցած բախումները՝ ԵԱՀԿ գործող նախագահը բանակցային գործընթացին նոր խթան հաղորդելու հույս է հայտնել:
«Շփման գծում բախումները և հրադադարի լուրջ խախտումները, որոնք բազմաթիվ զոհերի պատճառ են դառնում, անցած մեկ տարվա ընթացքում առանձնակի մտահոգության տեղիք են տվել: Այժմ ժամանակն է կենտրոնանալ վստահության ստեղծման ուղղությամբ պրագմատիկ և պրակտիկ քայլերի, ինչպես նաև առարկայական բանակցությունների վերսկսման վրա»,- ընդգծել է Կուրցը:
Նա իր ափսոսանքն է հայտնել 2016 թվականի ողբերգական դեպքեր պատճառով ունեցած զոհերի համար և ցավակցություն է հայտնել զոհերի ընտանիքներին:
«Մեկ տարի առաջ տեղի ունեցած մարտերի հետցնցումը բարդացրել է ադրբեջանցիների և հայերի համար խաղաղությանը հավատալը, բայց ինչպես ես նշել եմ բազմաթիվ առիթներով՝ Լեռնային Ղարաբաղի հակամարտությունը չունի ռազմական լուծում: Մենք այսօր պետք է կազմենք խաղաղության ծրագիր և թույլ չտանք պատերազմի վերադարձն իր բոլոր սարսափելի հետևանքներով»,- հավելել է Կուրցը:
Նա ընդգծել է նաև ԵԱՀԿ գործող նախագահի անձնական ներկայացուցիչ Անջեյ Կասպշիկի և նրա թիմի աշխատանքը, որի վկայությունն է 2017 թվականի փետրվարին Կարմիր խաչի միջազգային կոմիտեի մարդասիրական գործողությանն ակտիվ աջակցությունը մահացած զինծառայողների մարմինների վերադարձի գործում:
Վերջում Ավստրիայի արտգործնախարարը նշել է, որ ԵԱՀԿ նախագահությունը պատրաստ է աջակցել 2016 թվականին Վիեննայի և Սանկտ Պետերբուրգի վեհաժողովների ժամանակ ձեռք բերված պայմանավորվածությունների իրականացմանը։
