ԵՐԵՎԱՆ, 30 մարտի — Sputnik. Հայաստանը 3.600 եվրո կվճարի Իրանի քաղաքացի Ավանես Ավաքեմյանին «Ավաքեմյանն ընդդեմ Հայաստանի» գործով: Այս մասին տեղեկացնում է ՄԻԵԴ-ի կայքը:
Ավանես Ավաքեմյանի բողոքը Հայաստանի Հանրապետության դեմ ներկայացրել է 2009 թվականին: Հայցվորը, մասնավորապես, նշել է, որ իշխանությունները չեն իրագործել իր օգտին կայացված վերջնական վճիռները: Խոսքը վերաբերում է պարտքի վճարման հետ կապված անհատների միջև վեճին, որը չկարգավորվելու դեպքում այն պետք է իրագործեին դատական կատարածուները:
2005, 2007 և 2008 թվականներին դատարանի կայացրած վճիռները, որոնք ի նպաստ հայցվորի են կայացվել, չեն իրագործվել 2007 թվականի հոկտեմբերի 24-ից 2012 թվականի փետրվարի 13-ը։ Դա նշանակում է, որ դատական վճիռների չիրագործումը տևել է չորս տարի և երեք ամիս: ՀՀ կառավարությունը չի տրամադրել այդ հետաձգումն արդարացնելու փաստարկ: Այդ պատճառով ՄԻԵԴ-ը վճռել է, որ Հայաստանի իշխանությունները, չձեռնարկելով վերջնական վճիռներն իրագործելու համար անհրաժեշտ քայլեր, խախտել են մարդու իրավունքների հռչակագրի վեցերորդ հոդվածը, ինչպես նաև հռչակագրի համար 1 արձանագրության առաջին հոդվածը, որը երաշխավորում է սեփականության իրավունքը:
Եվրոպական դատարանը վճռել է, որ տեղի է ունեցել նաև մարդու իրավունքների հռչակագրի 13-րդ հոդվածի խախտում, քանի որ նա չի ունեցել ներքին իրավական պաշտպանության միջոց՝ արագացնելու կատարողական վարույթը կամ ստանալու փոխհատուցում այդ վարույթի հետաձգման պատճառով առաջացած վնասների համար:
