ԵՐԵՎԱՆ, 14 հուլիսի-Sputnik. Արդարադատության նախարար Արփինե Հովհաննիսյանը վարչապետին ու գործադիրի անդամներին ներկայացրեց ՀՀ կառավարության 2015 թվականի դեկտեմբերի 24-ի N 1555-Ն որոշման մեջ լրացումներ կատարելու նախագիծը։
Մարդու իրավունքների եվրոպական դատարանի «Դոմազյանն ընդդեմ Հայաստանի» գործով 2016 թվականի փետրվարի 25-ի վճռի պահանջները ենթադրում են, որ կառավարության պահուստային ֆոնդից արդարադատության նախարարությանը 9 ամսվա ընթացքում պետք է փոխանցվի 3600 եվրոյին համարժեք ՀՀ դրամ։ Այսինքն` Հայաստանն այդ չափի գումար պետք է վճարի հայցվորին։
Կառավարությունն ընդունեց որոշումը։
«Դոմազյանն ընդդեմ Հայաստանի» գործը Եվրադատարանում է 2007 թվականից։ Հայցվոր Թամարա Դոմազյանը 2005 թվականին ստացել էր Երևանում իրեն պատկանող, սակայն ապօրինի ավտոտնակի և օժանդակ շինության նկատմամբ սեփականության վկայական։ Այն տրամադրվել էր քաղաքապետի որոշման հիման վրա։ Արդեն 2006 թվականին քաղաքապետն ընդունել էր մեկ այլ որոշում, որով չեղյալ էր համարել Դոմազյանի սեփականության իրավունքը։
Անցել է մեկ ամիս և քաղաքապետը հայց է ներկայացրել դատարան` անվավեր ճանաչելու սեփականության իրավունքը։ Ի վերջո Թամարա Դոմազյանը դիմել է Եվրադատարան այն հիմնավորմամբ, որ զրկվել է դատարան դիմելու իրավունքից, քանի որ Հայաստանում դատարանը մերժել է իր ներկայացուցչի հակընդդեմ հայցը։
