ԵՐԵՎԱՆ, 30 մարտի — Sputnik. Ծնողներ ունեցող երեխաների հայտնվելը մանկատանը երեխայի իրավունքների ոտնահարում է: Sputnik Արմենիայի հետ բացառիկ հարցազրույցում նման կարծիք հայտնեց ՀՀ աշխատանքի և սոցիալական հարցերի նախարար Արտեմ Ասատրյանը` չհերքելով, որ նման դեպքերն այսօր Հայաստանում եզակի չեն:
«Երեխան պիտի ապրի ընտանիքում: Իհարկե, մենք չենք խոսում այն ընտանիքների մասին, որտեղ երեխայի շահը ոտնահարված է: Այս դեպքում գործում են խնամատարության մարմինները, ծնողը զրկվում է ծնողական իրավունքից»,- ասաց նախարարը:
Կառավարությունն այսօր գիշերօթիկ խնամքի հաստատությունները վերափոխում է ընտանիքի և երեխայի աջակցության կենտրոնների: Նման փորձ արդեն արվել է Նուբարաշենի գիշերօթիկ կենտրոնում:
«Նախապես գնահատվում է ընտանիքի համայնքի կարիքները, թե ինչ կարիքներն են դրդել, որպեսզի երեխաները գտնվեն նման հաստատություններում: Եվ պարզվում է` մեծ մասամբ դրանք սոցիալական խնդիրներն են, որոնք լուծելի են»,- ասաց նախարարը:
Կարիքների գնահատումից հետո կազմվում է ընտանիքի աջակցության անհատական ծրագիր, որն իրականացվում է գործընկեր կազմակերպությունների աջակցությամբ։ Արդյունքում երեխան պետք է վերադառնա ընտանիք: Նուբարաշենի 66 երեխաներից ավելի քան 50-ն արդեն ապրում են ընտանիքում: Նախարարը, սակայն, նշում է, որ կան այնպիսի ընտանիքներ, որտեղ երեխաների վերադարձն աննպատակահարմար է կամ անհնար:
Նման երեխաների համար կառավարությունը ներդրել է խնամատար ընտանիքի ինստիտուտը:
