2017թ-ին կառավարությունը փորձելու է կայունացնել միջնաժամկետ ծրագրերում արտաքին պարտքը: Այս մասին այսօր լրագրողներին հայտնեց ֆինանսների նախարար Վարդան Արամյանը՝ հավելելով, որ դա նշանակում է, որ ՀՀ կառավարությունն առաջիկա 2 տարիներին «առավել պահպանողական վարքագիծ պիտի որդեգրի»:
«Իսկ պահպանողական վարքագիծ նշանակում է, որ որոշակի ծրագրեր, որոնք մենք նախատեսում էինք իրականացնել 17-18թթ-ին փոքր-ինչ կհետաձգվեն»,- ասաց Արամյանը:
Հետաձգվող ծագրերի թվում է նաև Հյուսիս-Հարավ ավտոճանապարհի առանձին հատվածների շինարարությունը: Վարդան Արամյանը, սակայն, վստահեցնում է, որ ընդհանուր շինարարական ծրագրի ավատը դրա հետևանքով չի հետաձգվի:
Վարդան Արամյանը չթաքցրեց, որ նման պահանջ ՀՀ կառավարության առջև դրել է Եվրասիական զարգացման բանկը:
Բանկի ներկայացուցիչը հայտարարել էր, որ պատրաստվում է ուղղումներ մտցնել Հայաստանին տրվող ֆինանսական վարկի երկրորդ մասնաբաժնի տրամադրման պայմաններում:
ՀՀ ֆինանսների նախարար Վարդան Արամյանը հոկտեմբերի 28-ին ընդունել է Եվրասիական զարգացման բանկի պատվիրակությանը՝ Բանկի երևանյան ներկայացուցչության տնօրեն Սերգեյ Իգնատովի գլխավորությամբ: Հանդիպման ընթացքում քննարկվել են Եվրասիական զարգացման բանկի և Կայունացման և զարգացման եվրասիական հիմնադրամի ֆինանսավորմամբ Հայաստանում իրականացվող ծրագրերի ընթացքը և նոր ծրագրերի մեկնարկի հնարավորությունները:
Մասնավորապես, քննարկվել են Հիմնադրամի ներդրումային վարկի միջոցներով իրականացվող «Ոռոգման համակարգերի արդիականացում» ծրագրի ընթացքը և Մաստարայի ջրամբարի կառուցման նախատեսվող ներդրումային ծրագրի իրականացմանն առնչվող հարցերը: Անդրադարձ է կատարվել նաև Կայունացման և զարգացման եվրասիական հիմնադրամի միջոցներից Հայաստանի Հանրապետությանը ֆինանսական վարկի երկրորդ մասնաբաժնի տրամադրման հետ կապված գործողությունների կատարողականին:
