ԵՐԵՎԱՆ, 14 հուլիսի-Sputnik. Գոհար Սարգսյան. Կառավարության նիստի ընթացքում վարչապետ Հովիկ Աբրահամյանը ՀՀ տրանսպորտի և կապի փոխնախարար Արթուր Առաքելյանին հարցրեց` ինչու՞ են ուշանում Հյուսիս-Հարավ ճանապարհի շինարարական աշխատանքները։
Հյուսիս-հարավ ճանապարհի աշխատանքների ուշացման վերաբերյալ խոսակցությունները Արթուր Առաքելյանին, պարզվում է, չեն հասել։ Նա վարչապետին ներկայացրեց, որ աշխատանքային հստակ ժամանակացույց կա, իսկ ուշացման մասին ահազանգ դեռ չեն ստացել։
«Արդյո՞ք իմ ասածն ահազանգ չէ։ Աշխատանքներն իսպանական ընկերությունն է իրականացնում, այդ ընկերությունը չարիք է այս գործում, ինչ-որ խնդիր կա այդ ընկերության հետ։ Ուսումնասիրե'ք»-պահանջեց Հովիկ Աբրահամյանը։
Արթուր Առաքելյանն էլ շարունակեց պնդել, որ համապատասխան ուսումնասիրությունն արված է, իրավիճակը` վերահսկելի։ Ի պատասխան` Հովիկ Աբրահամյանը հայտնեց, որ նման դժգոհություններն իրեն հասանելի են դարձել անմիջապես աշխատողներից ու պնդեց լրացուցիչ ուսումնասիրությունների վերաբերյալ իր պահանջը։
Կառավարության նիստից հետո Արթուր Առաքելյանը լրագրողներին հիշեցրեց Արտաշատ-Երևան-Արտաշատ` շահագործման հանձնված ճանապարհահատվածի մասին, որտեղ առկա էին թերություններ։ Դրա համար ընկերությանը տուգանել են։
«Այդ ճանպարհահատվածի համար մենք շուրջ 6 միլիոն դոլարի պահում ենք արել։ Բայց ընկերության հետ պայմանագիրը խզելու համար որևէ դրույթ կամ պատճառ չկա»,-ասաց Առաքելյանը։
Նա հայտնեց, որ վարչապետը երկու անգամ եղել է նշված հատվածում, և իրեն չի գոհացրել աշխատանքների իրականացման տեմպը։ Փոխնախարարն ասաց, որ վարչապետի հանձնարարականն իրենք պարտադիր կկատարեն, բայց միաժամանակ հիշեցրեց, որ իրենց գործունեությունը շատ կետերում սահմանափակվում է պայմանագրով։
