Մարտի 26 Երևանում տեղի ունեցավ հայտնի ռուս երգիչ Լեոնիդ Ագուտինի համերգը: Հանդիսատեսի հետ արտիստի կապը կայացավ: Իր ելույթի ընթացքում երգիչը զգաց դահլիճի էներգետիկան և տեսավ, որ դահլիճն արձագանքում է ու երգում:
«Ай яй яй» երգի կատարման ժամանակ Ագուտինը խնդրեց հավաքվածներին իր հետ պարել:
Երաժիշտը երգում էր, պարում և հաճույքով շփվում դահլիճի հետ: «Սրտի կեսը» («Половина сердца») հայտնի երգի կատարման համար նա դիմեց հայ հանդիսատեսին (չնայած դահլիճում ոչ միայն հայեր են):
«Երջանիկ եմ, որ մենք, վերջապես, այստեղ ենք: Քանի-քանի տարի անցավ, դժվար է նույնիսկ հաշվել: Ինչքան ժամանակ է այստեղ չէինք եղել, և վերջապես, այստեղ ենք, ու առաջին հերթին ձեր`դահլիճում լինելու ցանկություն և հնարավորություն շնորհիվ: Շատ շնորհակալ եմ ձեզ» — նշեց երգիչը:
Երկրպագուները երաժշտի հետ ավելի ակտիվ երգում էին հին հիթերը` «Շոգեքարշ» («Паровоз»), «Ինչպես չմտածեմ քո մասին», («Как не думать о тебе»), «Ամառային անձրև» («Летний дождь»), «Սևամորթ տղան» («Парень чернокожий») և այլն: Համերգի ժամանակ հնչեցին նաև նոր երգեր:
Instagram-ի իր էջում երաժիշտն արդեն հասցրել է լուսանկար և տեսագրություն տեղադրել` շնորհակալություն հայտնելով Երևանին` ջերմ ընդունելության համար: Վերջին լուսանկարի տակ նա գրել է. «Մի քիչ էլ երեկվա երևանյան արևից: Շնորհակալություն, հինավուրց քաղաք»։
«Զվարթնոց» օդանավակայանում Sputnik Արմենիայի թղթակցի հետ զրույցի ընթացքում Ագուտինը նշեց, որ իր թիմի հետ միասին նա կնվիրի հայ հանդիսատեսին հիանալի ապրումներ և հուսով է, որ արձագանք կստանա: Այդպես էլ եղավ: Դահլիճն այնքան բարձր էր ծափահարում, որ երգիչը խոստովանեց. «Ծափահարությունները ցանկացած արտիստի համար ամենակարևոր են, չնայած որ դրա մասին ընդունված չէ խոսել»:
Իհարկե, եղավ նաև «բիս»: Համերգի ավարտից հետո, հայ հանդիսատեսը չէր ուզում բաց թողնել Ագուտինին և նրա երաժիշտներին: Երգիչը կատակով նշեց, որ չի պատրաստվում ավանդական ձևով գնալ բեմից` սպասել, որ հանդիսատեսը ծափահարի 15 րոպե, ապա վերադառնալ: Ագուտինն առաջարկեց «կոմպրոմիս գտնել»` չգնալ բեմից, այլ միանգամից երգել:
Հանդիսատեսը հիացմունքով արձագանքեց առաջարկությանը: Ավարտելով համերգը`Ագուտինը երգեց հայտնի և սիրած «Մանուշակագույն լուսնի վրա» («На сиреневой луне») երգը: Ռուսաստանի ամենապահանջված երաժիշտներից մեկը հալեցրեց Հայաստանի հանդիսատեսի սրտի սառույցը` խորհրդարանական ընտրությունների նախօրեին:
Հ.Գ. Ավարտելով հոդվածը դրական նոտայով` ուզում եմ նշել, որ սոցկայքերում համերգից առաջ նույնիսկ գտնվեցին մարդիկ, ովքեր համեմատեցին Լեոնիդ Ագուտինին Հայաստանի վարչապետ Կարեն Կարապետյանի հետ: Մանավանդ ոճային առումով. երաժիշտը բեմ դուրս եկավ նորաձև բաճկոնով:
