ԵՐԵՎԱՆ, 24 մարտի — Sputnik. «Հայկական իմպրեսիոնիզմ. Մոսկվայից Փարիզ» ցուցադրության ընթացքում կներկայացվի ավելի քան 20 հայ իմպրեսիոնիստի 58 աշխատանք:
«Այցելուները կկարողանան տեսնել աշխարհահռչակ վարպետ Մարտիրոս Սարյանի աշխատանքները: Մեծն հայ նկարիչը Վալենտին Սերովի և Կոնստանտին Կորովինի աշակերտն էր, Կուզմա Պետրով-Վոդկինի համակուրսեցին: Կներկայացվեն նաև լայն հասարակությանը ոչ այնքան հայտնի նկարիչների գործեր, որոնք իրենց գեղեցկությամբ չեն զիջում Էդուարդ Մանեի, Էդգար Դեգայի, Պիեր Օգյուստ Ռենուարի, Կամիլ Պիսսարոյի, Կլոդ Մոնեի ստեղծագործություններին: Դրանք Եղիշե Թադևոսյանի աշխատանքներն են, որն առանցքային կերպար է հայկական արվեստում»,- Sputnik Արմենիայի թղթակցին հայտնեցին ցուցադրության կազմակերպիչները:
Եղիշե Թադևոսյանն ակտիվ մասնակցություն է ունեցել Շարժական գեղարվեստական ցուցահանդեսների ընկերության և «Արվեստի աշխարհ» միավորման գործունեությանը, ընկերություն է արել Վասիլի Պոլենովի և Միխայիլ Վրուբելի հետ:
Մոսկովյան հասարակությանը կներկայացվեն նաև Սեդրակ Առաքելյանի`նուրբ, պոետիկ նկարչի կտավները, որոնցում համադրվում են վառ կոլորիտը և ծավալների փափուկ մոդելումը: Ներկայացված կլինեն նաև Վահրամ Գայֆեճյանի աշխատանքները, որը Կոնստանտին Կորովինի հետ դեկորացիաներ է ստեղծել Մեծ թատրոնի ներկայացումների համար:
Ինչպես նշում են միջոցառման կազմակերպիչները, հայերից շատերը Մոսկվայում ու Սանկտ Պետերբուրգում սովորել են իրենց ժամանակի առաջատար վարպետների` Վասիլի Պոլենովի, Կոնստանտին Կորովինի, Վալենտին Սերովի մոտ:
Հայկական իմպրեսոինիզմը բացառիկ է, քանի որ ցուցադրում է բազմադարյա ազգային մշակութային ավանդույթների հանդեպ նվիրվածությունը, ներկայացնում հարազատ երկրի, հայկական փոքրիկ փողոցների և գյուղերի գեղեցկությունը:
Հայաստանն ամբողջ աշխարհում հայտնի է իր ազգային խոհանոցով ու հայկական կոնյակով, Արշիլ Գորկու ազդեցիկ կտավներով ու Սերգեյ Փարաջանովի գլուխգործոցներով: Ռուսական իմպրեսիոնիզմի թանգարանը ներկայացնում է Հայաստանի մասին ոչ այնքան հայտնի էջը` հայ իմպրեսիոնիստներին, որոնք կարողացել են լավագույնը կլանել Մոսկվայում և Փարիզում:
Թանգարանի տնօրեն Յուլիա Պետրովայի կարծիքով՝ հանդիսատեսը պետք է ծանոթանա տարբեր դպրոցների իմպրեսիոնիզմին:
«Մեկ տարի առաջ թանգարանը բացելիս մենք հայտարարեցինք ռուսական իմպրեսիոնիզմի ֆենոմենի մասին և պնդում ենք, որ այդ ուղղությունը գոյություն է ունեցել նաև Ֆրանսիայի սահմաններից դուրս: Այդ պատճառով մեզ համար շատ կարևոր է պատմել, թե ինչպես է իմպրեսիոնիզմը զարգացել տաբեր երկրների արվեստում: Դա մեր ծրագրի մի մասն է: Հայկական իմպրեսիոնիզմը, որի հետ մենք վերջերս ենք ծանոթացել, լիովին եվրոպական է: Կարծում եմ՝ մեր այցելուները չէին տեսել ու չէին էլ սպասում այդպիսի Հայաստան տեսնել», — ասաց Պետրովան:
Նա նշեց, որ կցուցադրվի նուրբ գեղանկարչություն, որը թեթևության, օդի, տարածության, հանգստության և խաղաղության զգացողություն է հաղորդում։
