ԵՐԵՎԱՆ, 24 մարտի — Sputnik. Հայաստանի նախագահ Սերժ Սարգսյանը կարծում է, որ Հայաստանն ավելի շատ խնդիրների կբախվեր, եթե չընդգրկվեր Եվրասիական տնտեսական միության կազմում։
Նրա խոսքով` անվտանգության հարցերն անհնար է լուծել առանց տնտեսական հնարավորությունների։ Արդյունքում ԵԱՏՄ հարթակում երկրի տնտեսությունը ստացել է «բոլոր չորս ազատությունները, հանուն որոնց ստեղծվել է այս կազմակերպությունը` ապրանքների, կապիտալների, ծառայությունների և աշխատուժի տեղաշարժման ազատություն»։
«Մենք դարձել ենք շատ մեծ շուկայի մաս, դա հնարավորություն է տալիս Հայաստանին ավելի շատ արտադրանք արտահանել։ 2015թ-ին և 2016թ-ին մեր արտահանումն ունեցել է շուրջ 20 տոկոս աճ։ Մեզ համար դա արտահանումն է, իսկ ընդհանուր սպառողական շուկայի համար` ապրանքները և ծառայությունները», — ասել է Սարգսյանը «Միր» հեռուստաալիքին տված հարցազրույցում, որի տեքստը հրապարակվել է հեռուստաընկերության կայքում։
Ըստ նրա` ԵԱՏՄ-ի ստեղծումը ժամանակային առումով համընկել է համաշխարհային տնտեսությունում տեղի ունեցող բացասական գործընթացների հետ, իսկ դա քաղաքացիների համար դժվարացրել է ԵԱՏՄ մտնելու օգուտը զգալու հնարավորությունը։ Սակայն նա չի զղջում կազմակերպության անդամ դառնալու որոշման համար։
Հայաստանի նախագահը նաև նշել է, որ բոլոր հարցերի լուծման համար ժամանակ է պետք։ Որպես օրինակ` նա նշել է Եվրոպական միությունը, որի անդամները երկար ժամանակ հաղթահարում էին միմյանց միջև առկա հակասությունները։ Նա խոսել է նաև ՀԱՊԿ-ում Հայաստանի դերի մասին։
«Աշխարհը փոխվում է… Ուստի մեր կազմակերպությունը պետք է ադապտացվի, զարգանա, մենք կողմ ենք կազմակերպության զարգացմանը։ Անցած տարի Երևանում խորհրդի նիստի ընթացքում, մենք ընդունել ենք մինչև 2025թ-ը հավաքական անվտանգության ռազմավարությունը։ Մեր նախագահության սկզբից դա մեզ համար կարևորագույն խնդիր է եղել, և մենք կարողացել ենք կատարել այն։ Այդ ռազմավարությունում նախանշված են մեր կազմակերպության զարգացման բոլոր ուղենիշները», — ասել է Սարգսյանը։
Նրա կարծիքով` Հայաստանի և կազմակերպության այլ շահագրգիռ անդամների համար կարևոր է ՀԱՊԿ-ի զարգացումը։
