ԵՐԵՎԱՆ, 11 մարտի — Sputnik. Հայաստանը լավ արդյունք է ցույց տվել ԵԱՏՄ երկրների շարքում՝ արտահանման աճի առումով, ասաց Եվրասիական զարգացման բանկի գլխավոր տնտեսագետ Յարոսլավ Լիսովոլիկը Երևանում «Վալդայ» ակումբի միջազգային բանավիճային ակումբի «Փոփոխությունների ժամանակը. աշխարհը գլոբալ անկանխատեսելիության դարաշրջանում» արտագնա նիստում:
Նրա խոսքով՝ ԵԱՏՄ շրջանակում ինտեգրումը գնահատելիս ամենից առաջ հաշվի են առնվելու երկու առանցքային չափանիշներ՝ առևտուրը և ներդրումները. ինչպես են դրանք զարգանում միության երկրների միջև:
«Հայաստանի հետ կապված իրավիճակն ավելի լավ է, քան միության երկրների մեծամասնության մոտ: Նշեմ, որ նախորդ տարվա ընթացքում Հայաստանում գրանցվել է արտահանման լուրջ աճ՝ առավելապես ԵԱՏՄ երկրներ, առաջին հերթին՝ Ռուսաստան: Այդ դրական գործոնը թույլ է տվել հայկական տնտեսությանը խթանել աճը», — ասաց Լիսովոլիկը:
Նրա խոսքով՝ հասկանալի է, որ հայկական տնտեսությունը մի շարք ոլորտներում բախվում է բազմաթիվ խնդիրների հետ, այդ թվում՝ արտաքին գործոնների և դրամական փոխանցումների հոսքի նվազման: Արտահանման աճն ինչ-որ առումով փոխհատուցել է բացասական գործոնները, և թույլ տվել Հայաստանին տնտեսական աճ գրանցել անցած տարի, ինչը վատ արդյունք չէ ԵԱՏՄ երկրների համար:
