ԵՐԵՎԱՆ, 23 մարտի — Sputnik. Եվրոպական հեռարձակող միությունը (EBU) աննախադեպ քայլի է դիմել և ռուսական Առաջին ալիքին հնարավորություն է ընձեռել Յուլյա Սամոյլովայի ելույթը «Եվրատեսիլ» երգի մրցույթում հեռարձակել արբանյակային կապի միջոցով։ Ավելի վաղ Ուկրաինայի անվտանգության ծառայությունն արգելել էր Սամոյլովայի մուտքը Ուկրաինա՝ պատճառաբանելով, որ նա եղել է Ղրիմում։
«Մրցույթի 60-ամյա պատմության ընթացքում մենք նման բան չենք արել։ Սակայն որոշվել է մրցույթի բոլոր 43 մասնակիցներին մասնակցության հնարավորություն տալ», — գրված է EBU-ի հայտարարության մեջ։
Այդպիսով, Յուլյան կկարողանա ելույթ ունենալ երկրորդ կիսաեզրափակչում. նա կերգի Մոսկվայում, բայց ուղիղ հեռարձակման միջոցով նրա ելույթը կտեսնի ամբողջ աշխարհը։ Եզրափակիչ անցնելու դեպքում աղջիկը կրկին արբանյակային հեռարձակման միջոցով կմիանա մրցույթին։ Կիևի Ցուցահանդեսային կենտրոնում, որտեղ անցկացվելու է մրցույթը, Սամոյլովայի ելույթը կցուցադրեն էկրաններին։
«Եվրատեսիլի» ղեկավար մարմնի ռեֆերենս-խմբի նախագահ Ֆրենկ-Դիտեր Ֆրեյլինգը հույս է հայտնել, որ Ուկրաինայի քաղաքական ղեկավարությունն ամեն դեպքում կանդրադառնա Յուլյա Սամոյլովայի մասնակցության հարցին և խնդիրը կլուծի «Եվրատեսիլի» «Հարգեք բազմազանությունը» կարգախոսի համաձայն։
Ուկրաինայի փոխվարչապետն էլ իր հերթին անդրադարձել է EBU-ի որոշմանը:
«Ուկրաինան մտադիր չէ հեռարձակել ռուս երգչուհի Յուլյա Սամոյլովայի ելույթը «Եվրատեսիլում»,- ասել է երկրի փոխվարչապետ Վյաչեսլավ Կիրիլենկոն։
Ուկրաինայի իշխանություններն EBU-ի առաջարկի մեջ «անօրինականություն» են տեսել։
«Սամոյլովայի ելույթի հեռարձակումը ուկրաինական հեռուստաալիքներով նույնպես խախտում է Ուկրաինայի օրենքները։ Եվրոպական հեռարձակող միությունը պետք է դա հաշվի առնի», — գրել է Կիրիլենկոն իր միկրոբլոգում։
