ԵՐԵՎԱՆ, 23 մարտի — Sputnik. Համայնքային ճանապարհները մտահոգում են վարչապետ Կարեն Կարապետյանին։ Այս մասին նա հայտնեց կառավարության օրակարգին անցնելուց առաջ` հանձնարարականների փուլում։ Վարչապետի շեշտադրումը հատկապես ուղղվեց Հյուսիս-հարավ ճանապարհային ծրագրին և տրվեց համապատասխան հանձնարարական։
«Այս հանձնարարականն ուզում եմ մեկնաբանել. 9-ն անց կես «մոստերի» վրա աշխատող չկա: 5-ն անց կես բոլորը «պերեկուր» են անում: Ես մի անգամ այդ հարցը տվել եմ, ասել են՝ ժամկետի մեջ է: Եթե այսպես են աշխատում, ժամկետը կարճացրեք: Որևիցե աշխատանք չի կատարվում»,-ասաց վարչապետը։
Կառավարության նիստից հետո տրանսպորտի, կապի և տեղեկատվական տեխնոլոգիաների փոխնախարար Արթուր Առաքելյանը լրագրողների հետ զրույցում նշեց, որ իրավահարաբերությունները կապալառու կազմակերպությունների հետ կարգավորվում են բացառապես պայմանագրով, հետևաբար կա որոշված վերջնաժամկետ։ Սակայն նա նշեց, որ վարչապետի հանձնարարականից հետո իրենք բանակցություններ կտանեն կապալառու կազմակերպությունների հետ, որ նախատեսվածից արագ ավարտեն աշխատանքները։
«Վարչապետ Կարապետյանը կոնկրետ կամուրջներ նկատի ուներ։ Իհարկե, մենք անհանգստություն ենք պատճառում, որ փակ ենք պահում ճանապարհը, բայց ստիպված ենք։ Սա բարդ ենթակառուցվածքային ծրագիր է»,- ասաց փոխնախարարը։
Նա ավելացրեց, որ պայմանագրերի տևողությունը հիմնականում սահմանվում է ըստ քաղաքաշինական նորմերի, իսկ ճանապարհները փակ են մնում` ելնելով անվտանգության նորմերից։
«Մեզ խոստացել են 2 կամուրջն ավարտել 2017 թվականի սեպտեմբերին։ Տեղեկացնեմ նաև, որ Աշտարակից դեպի Թալին ճանապարհն ակտիվ իրագործման փուլում է, որն իսպանական ընկերության հետ կնքված պայմանագրի շրջանակում է։
Անցած տարի 3 կմ բետոնային աշխատանք արվեց, որն ըստ էության արդեն բոլոր փորձարկումներն անցել է և ցույց տվել, որ որակական ցուցանիշներին համապատասխանում է»,- տեղեկացրեց Արթուր Առաքելյանը։
ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանն ավելի վաղ հայտնել էր, որ Արարատ-Արտաշատ-Աշտարակ ճանապարհահատվածում կամուրջների շինարարությունը նախատեսվում է ավարտին հասցնել մինչև այս տարվա վերջ։
Մինչ օրս Հյուսիս-հարավ ավտոմայրուղու միայն 35 կմ-ն է կառուցված, որի համար ծախսվել է 70 միլիոն դոլար։ Նշենք, որ արագընթաց մայրուղին ձգվելու է Հայաստանի և Իրանի սահմանից` Մեղրիից մինչև Հայաստանի և Վրաստանի սահմանային Բավրա անցակետը։ Նախատեսվածի համաձայն` ունենալու է 556 կմ երկարություն:
Ծրագիրն ամբողջապես ավարտելու համար պետք է 1,5 միլիարդ դոլար։
