ԵՐԵՎԱՆ, 29 դեկտեմբերի — Sputnik. «Հյուսիս-հարավ» մայրուղու Երևան-Արտաշատ (հարավ) և Աշտարակ (հյուսիս) 1-ին տրանշի շրջանակներում 2 հատվածների հանդիսավոր բացումը տեղի ունեցավ դեկտեմբերի 29-ին` ՀՀ նախագահ Սերժ Սարգսյանի մասնակցությամբ, հայտնում է երկրի նախագահի մամուլի ծառայությունը։
Հաղորդագրության համաձայն` «Հյուսիս-հարավ» ճանապարհային միջանցքի ենթակառուցվածքային խոշոր ներդրումային ծրագիրը նպատակ ունի միջազգային բարձր չափանիշներին բավարարող 556 կմ ընդհանուր երկարությամբ Մեղրի-Երևան-Բավրա ավտոճանապարհի միջոցով հանրապետության հարավային և հյուսիսային սահմանները կապել միմյանց հետ՝ կրճատելով ճանապարհի երկարությունը շուրջ 85 կմ-ով: Նշված տարածությունն անցնելը տրանսպորտային միջոցների համար ներկայիս 9-9.5 ժամից կնվազի մինչև 4.5 ժամ:
Ծրագրի իրագործման արդյունքում կբարձրանա երթևեկության հարմարավետությունն ու անվտանգությունը՝ ապահովելով նաև արևելքից արևմուտք իրականացվող տրանսպորտային շարժի և բեռնափոխադրումների տարանցիկ ճանապարհ դառնալու նպատակի իրագործումը, միաժամանակ, զարգացման լուրջ հնարավորություններ ընձեռելով Հայաստանի հարավից հյուսիս ընկած բնակավայրերին:
«Հյուսիս-Հարավ» բետոնե նոր մայրուղին կբարձրացնի Հայաստանից Ռուսաստան և դեպի ԱՊՀ այլ երկրներ կարեւորագույն բեռնափոխադրումների հուսալիությունը»,- բացման ժամանակ լրագրողներին ասաց Հայաստանի միջազգային բեռնափոխադրումների ասոցիացիայի նախագահ Հերբերտ Համբարձումյանը, հայտնում է news.am-ը։
Նրա խոսքերով` ոչ ոքի համար գաղտնիք չէ, որ Հայաստանի հետ բեռնափոխադրումների առյուծի բաժինը հասնում այդ երկրներին՝ Ռուսաստանին, Բելառուսին, Միջին Ասիային։ Դրանով հեշտանում է այդ ուղղություններով երթևեկությունը։
Նոր ճանապարհն ավելի հարմարավետ կլինի խոշոր բեռնափոխադրումների համար։
«Առաջ ձմռանը բեռնատարները կարող էին մնալ ճանապարհին մերկասառույցի պատճառով։ Երբեմն ստիպված էինք լինում մինչև 2 օր սպասել։ Իսկ այստեղ նման հարցեր չեն առաջանա»,- ասել է Համբարձումյանը։
Հանրապետության համար ռազմավարական նշանակության կարևոր այդ ճանապարհի՝ երկկողմանի երթևեկությամբ առաջին հատվածի բացումից հետո, ծրագրի պատասխանատուները նախագահին զեկուցել են «Հյուսիս-հարավ» ճանապարհային միջանցքի կառուցման ծրագրի ընթացքի և առաջիկա զարգացումների մասին:
