ԵՐԵՎԱՆ, 23 մարտի — Sputnik, Լաուրա Սարգսյան. «Իգլա» տեսակի զենիթահրթիռային համալիրի՝ Վրաստանից Հայաստան տեղափոխելու շուրջ ծավալված աղմուկը դեռ չմարած՝ վրացական մամուլում մեկ այլ սադրիչ տեղեկություն հրապարակվեց, որի հեղինակը «Միասնական ազգային շարժում» ընդդիմադիր կուսակցության առաջնորդ Նուգզար Ցիկլաուրին էր։
Ցիկլաուրին համացանցում տեսանյութ էր տեղադրել, որում երևացող ռուսական պետհամարանիշներով բեռնատարները, ըստ նրա, Բոլնիսից Հայաստան էին տեղափոխում ռազմական տեխնիկա։ Ցիկլաուրին ենթադրել էր, որ դրանք «Բուկ» տեսակի զենիթահրթիռային համակարգեր են:
«Ընդդիմադիր «Միասնական ազգային շարժում» կուսակցության նպատակը իշխող կուսակցությանը վարկաբեկելն էր։ Կուսակցության նման արարքը նորություն չէ և հաճախ է օգտագործվում ընդդիմադիր ուժերի կողմից», — Sputnik Արմենիայի թղթակցի հետ զրույցում ասաց Հայաստանի պետական կառավարման ակադեմիայի տարածաշրջանային հետազոտությունների կենտրոնի գիտաշխատող, Վրաստանի հարցերով փորձագետ Ջոնի Մելիքյանը։
Նրա խոսքով` «Իգլայի» ու «Բուկի» վերաբերյալ տեղեկությունների միջև ընդհանրություն պետք չէ փնտրել։ Ըստ փորձագետի՝ կուսակցության գործողությունները բխում են Վրաստանում ստեղծված ներքաղաքական պայքարի տրամաբանությունից, ոչ ավելին։ «Միասնական ազգային շարժումը» փորձեց վարկաբեկել «Վրացական երազանք» կոալիցիային, ու եթե այդ փորձերը ձախողվեցին և հարցն արդեն փակված է, ապա «Իգլայի» հարցը դեռ երկար ժամանակ կմնա չլուծված։
Նշնեք, որ 2008 թվականի պատերազմից հետո Վրաստանի տարածքով ռուսական ռազմամթերքի և անձնակազմի տարանցում չի իրականացվել (102-րդ ռազմակայանի համար)։ Սոչիում 2006 թվականի մարտի 31-ին Վրաստանի տարածքից ռուսական ռազմակայանները դուրս բերելու մասին պայմանագրին զուգահեռ ստորագրվեց նաև Վրաստանի տարածքով «Ռազմամթերքի և անձնակազմի տարանցման մասին համաձայնագիրը»։
Վրաստանի խորհրդարանը համաձայնագրերը վավերացրեց 2007 թվականի ապրիլի 13-ին։
Սակայն երկու տարի անց՝ 2011 թվականի ապրիլի 19-ին, Վրաստանի խորհրդարանը միաձայն որոշեց դադարեցնել Ռուսաստանի հետ 2006 թվականի մարտի 31-ին ստորագրած «Ռազմամթերքի և անձնակազմի տարանցման մասին» համաձայնագրի գործողությունները»։ Այդ որոշմամբ դե-յուրե արգելվեց Հայաստանում տեղակայված 102-րդ ռուսական ռազմակայանի համար ռազմամթերքի և անձնակազմի տեղափոխումը Վրաստանի տարածքով։
