ԵՐԵՎԱՆ, 23 մարտի — Sputnik. Հայկական սահմանային անցակետում Հայաստանի երեք քաղաքացիների ձերբակալման գործով Վրաստանի ներքին գործերի նախարարությունը կապի մեջ է Երևանի գործընկերների հետ։ Այս մասին հայտարարել է Վրաստանի ՆԳ նախարար Գեորգի Մգեբրիշվիլին:
«Առայժմ հաստատ չենք կարող ասել, որ «Իգլա» տեսակի զենիթահրթիռային համալիրը Հայաստան է տեղափոխվել Վրաստանից: Այս պահին քննվում են մանրամասները: Մենք կապի մեջ ենք հայ գործընկերների հետ և հանրությանը կհայտնենք քննության արդյունքների մասին»,- ասել է նա։
Վրաստանի իշխանության որոշ ներկայացուցիչներ հերքել են, որ Ռուսաստանից Հայաստան Վրաստանի տարածքով ռազմական տեխնիկա է տեղափոխվել։
«Տեղեկությունն այն մասին, որ ինչ-որ ռազմական տեխնիկա է տեղափոխվել Վրաստանից, իրականությանը չի համապատասխանում։ Նման տեղեկություն են տարածել Վրաստանի թշնամիները, որոնք ուզում են սրել բարեկամական հարաբերությունները։ Վրաստանի տարածքով օտարերկրյա ռազմական տեխնիկա չի տեղափոխվել», — ասել է տարածաշրջանային զարգացման և ենթակառուցվածքների նախարար Զուրաբ Ալավիձեն։
Չորեքշաբթի Վրաստանի «Միասնական ազգային շարժում» կուսակցության առաջնորդ Նուգզար Ցիկլաուրին հայտնել էր, որ Բոլնիսի շրջանում ռուսական համարներով մի քանի բեռնատար է նկատվել, որոնք բեռներ են տեղափոխել։ Ցիկլաուրիի խոսքով` հավանաբար դա «Բուկ» զենիթահրթիռային համակարգ է եղել։ Նրա խոսքով՝ բեռնատարները Ռուսաստանից Հայաստան էին գնում։
Վրաստանի պաշտպանության նախարարությունը կտրականապես հերքել է այդ տեղեկությունը։
