ԵՐԵՎԱՆ, 22 մարտի — Sputnik. Այսօր ՀՀ ազգային անվտանգության ծառայությունը ձերբակալել է Արցախի պաշտպանության նախկին նախարար Սամվել Բաբայանին։ ՕՐՕ դաշինքը համոզված է, որ այս քայլը կանխատեսելի էր։
«Արմավիրի մարզի Ջրառատ գյուղում «Օհանյան-Րաֆֆի-Օսկանյան» դաշինքի դեմ կազմակերպված ակնհայտ սադրանքը, ինչպես նաև դաշինքի շտաբների և պատգամավորության թեկնածուների նկատմամբ զանգվածային բնույթ կրող ճնշումները նպատակ էին հետապնդում վախի մթնոլորտ տարածելու և խոչընդոտելու մեր աշխատանքները»,- նշված է հայտարարության մեջ։
Ըստ դաշինքի առաջնորդների` Սամվել Բաբայանի դեմ քայլը նախապատրաստվում էր օրեր շարունակ։
«Մենք իշխանությունների այս վարքագիծը գնահատում ենք որպես մեր երկրում վախի մթնոլորտ ձևավորելուն և ընտրությունների արդյունքների վրա հակաօրինական միջոցներով ազդելուն ուղղված քայլ»,- նշված է հայտարարության մեջ։
«Օհանյան-Րաֆֆի-Օսկանյան» դաշինքը շարունակում է իր բնականոն աշխատանքները` վստահեցնելով, որ չեն տրվելու սադրանքների։
Նրանք կոչ են անում միջազգային հանրությանը, դիտորդական առաքելություններին, դիվանագիտական ներկայացուցչություններին` ուշադրության կենտրոնում պահել Ս. Բաբայանի հետ կապված գործը։
Կոչ են անում քաղաքական ուժերին, իրավապաշտպան կազմակերպություններին, քաղաքացիական հասարակությանը, Արցախի և Սփյուռքի հայրենակիցներին` համարժեք գնահատական տալ տեղի ունեցածին։
Հայտարարության տակ ստորագրել են Սեյրան Օհանյանը, Րաֆֆի Հովհաննիսյանը և Վարդան Օսկանյանը։
