ԵՐԵՎԱՆ, 19 մարտի — Sputnik. Հայկական դիվանագիտությունը կարող է մի շարք առավելություններից օգտվել, Sputnik Արմենիային ասաց քաղաքական գիտությունների թեկնածու, Միջազգային հարցերի ռուսական խորհրդի ծրագային տնօրեն Իվան Տիմոֆեևը:
«Հայաստանը կարող է բավական մեծ դերակատարություն ունենալ: Կարծրատիպ կա, որ երկրի դիվանագիտական ազդեցությունը կախված է նրա չափերից ու հարստությունից: Սակայն փորձը ցույց է տալիս, որ այդպես չէ: Կան փոքր երկրներ, որոնք մեծ դեր են խաղում դիվանագիտության, միջնորդական առաքելության և այլ հարցերում: Օրինակ՝ Ֆինլանդիան, որտեղ ստորագրվել են Հելսինկյան համաձայնագրերը», — ասաց Տիմոֆեևը:
Նրա խոսքով` Հայաստանը մեծ ներուժ ունի, քանի որ ԵԱՏՄ ինտեգրացիոն միավորումների ակտիվ մասնակից է և միաժամանակ բաց է ԵՄ-ի հետ համագործակցության համար:
«Հայկական դիվանագիտությունը շատ խելամիտ, բավական ճիշտ և պրագմատիկ շեշտադրումներ է անում», — ասաց Տիմոֆեևը:
Փորձագետի կարծիքով` հայկական դիվանագիտության մեջ մեծ դեր ունի սփյուռքը:
«Որքան ասես կարելի է խոսել, որ երկիրը փոքր է, սակայն սփյուռքի ազդեցությունը տարբեր երկրներում, բիզնեսի ոլորտում, կրոնի, քաղաքականության և հասարակական հատվածում ահռելի է», — նշեց քաղաքագետը:
Այլ հարց է, թե ինչպես է պետք այդ ամենը համակարգել, քանի որ սփյուռքն էլ ամեն երկրում տարբեր է: Սակայն Տիմոֆեևի կարծիքով՝ սփյուռքը պոտենցիալ «վառելանյութ է աճի» և հայ դիվանագիտության զարգացման համար:
