ԵՐԵՎԱՆ, 16 մարտի — Sputnik. Մոսկվան պատրաստ է աջակցել Երևանի և Անկարայի միջև բանակցություններին, եթե դրանք սկսվեն, և կողջունի հայ-թուրքական սահմանի բացումը: Այդ մասին հայտարարել է ՌԴ արտգործնախարար Սերգեյ Լավրովը` Regional Post- Caucasus ամսագրին տված հարցազրույցում։
Հարցազրույցի տեքստում, որը հրապարակվել է ՌԴ արտգործնախարարության կայքում, նշվել է, որ Ռուսաստանը կարևոր դեր է խաղացել 2007-2009 թվականներին Հայաստանի և Թուրքիայի միջև հարաբերությունների կարգավորման հարցում, բայց ավելի ուշ կարգավորման գործընթացը կանգ է առել:
«Սկզբունքորեն կարևոր է, որ կողմերը պայմանավորվելու և լուրջ, պատասխանատու որոշումներ կայացնելու ունակություն են դրսևորել: Վստահ եմ, որ Հայաստանը և Թուրքիան ունակ են կարգավորել ունեցած խնդիրները: Ընդ որում՝ շատ բան կախված է հենց նրանցից: Քաղաքական գործիչների որակը որոշվում է ոչ միայն օբյեկտիվ դժվարությունների իրատեսական վերլուծության խորությամբ, այլև լավատես լինելու ունակությամբ՝ իրենց քաղաքացիների հույսերը և ձգտումներն իրականացնելու համար»,- ասել է նա:
Անդրադառնալով ԵԱՏՄ արտաքին սահմանի հայ-թուրքական հատվածին և դրա կարևորությանը` նախարարը նշել է, որ դրա բացումն, անկասկած, դրական ազդեցություն կունենա տարածաշրջանի վրա։
«Բնականաբար, մենք միայն կողջունենք, որ Եվրասիական տնտեսական միության արտաքին սահմանի հայ-թուրքական հատվածը բաց լինի մարդկանց, ապրանքների և ծառայությունների ազատ տեղաշարժի համար»,- ընդգծել է Սերգեյ Լավրովը:
Նախարարը նշել է, որ Ռուսաստանի և Թուրքիայի միջև հարաբերությունների կարգավորումը չպետք է դիտարկել որպես գործընթաց, որը կարող է վնասել այլ պետություններին:
