ԵՐԵՎԱՆ, 15 մարտի — Sputnik. Հայաստանի նախագահ Սերժ Սարգսյանը հայտարարել է, որ ուժի կամ ուժի սպառնալիքի կիրառումը վնաս է հասցնում ղարաբաղյան հակամարտության խաղաղ կարգավորմանը։
«Մենք համակարծիք ենք, որ ուժի կամ դրա սպառնալիքի կիրառումը բացարձակ անթույլատրելի է և լուրջ վնաս է հասցնում խաղաղ գործընթացին», — ասել է Սարգսյանը Պուտինի հետ բանակցությունների արդյունքում։
Նա հայտարարել է, որ ՌԴ նախագահ Վլադիմիր Պուտինի հետ քննարկել է անհրաժեշտ պայմանների ստեղծումը` ղարաբաղյան կարգավորման բանակցությունների առաջխաղացման համար։ Բանակցությունների ընթացքում մանրամասն քննարկվել են տարածաշրջանային անվտանգության թեմաներ։
«Մենք մանրամասն քննարկել ենք տարածաշրջանում անվտանգության թեման` առանձնահատուկ ուշադրություն դարձնելով ղարաբաղյան հակամարտության կարգավորմանը, բանակցային գործընթացի առաջխաղացման համար անհրաժեշտ պայմանների ստեղծմանը։ Մենք բարձր ենք գնահատում Ռուսաստանի, ինչպես նաև ԵԱՀԿ Մինսկի խմբի մյուս համանախագահների ավանդը։ Կայացած բանակցություններից հետո կրկին ընդգծվել է հրադադարի մասին համաձայնագրերի կարևորությունը, նշվել է Վիեննայում և Սանկտ Պետերբուրգում ձեռք բերված պայմանավորվածությունների իրագործման անհրաժեշտությունը», — ասել է Սարգսյանը։
Նա նաև նշել է, որ ՌԴ նախագահի հետ քննարկել են կարևոր միջազգային և տարածաշրջանային հարցեր, իրավիճակը Մերձավոր Արևելքում, սիրիական ճգնաժամը։
