ԵՐԵՎԱՆ, 15 մարտի — Sputnik. Ռուսաստանը շարունակում է ամեն կերպ աջակցություն ցուցաբերել արցախյան հակամարտության փոխադարձ ընդունելի հանգուցալուծմանը ` ինչպես ԵԱՀԿ Մինսկի խմբի շրջանակում, այնպես էլ Երևանի և Բաքվի հետ ուղիղ շփումների ընթացքում, չորեքշաբթի հայտարարել է ՌԴ նախագահ Վլադիմիր Պուտինը` ռուս-հայկական բանակցությունների արդյունքում։
«Մենք առանձին ուշադրություն ենք դարձրել ղարաբաղյան խնդրի կարգավորմանը։ Ռուսաստանը շարունակում է ամեն կերպ աջակցել հակամարտության փոխադարձ ընդունելի հանգուցալուծմանը ` ինչպես ԵԱՀԿ Մինսկի խմբի, այնպես էլ Երևանի և Բաքվի հետ ուղիղ շփումների ընթացքում», — ասել է Պուտինը։ Ռուսաստանի և Հայաստանի նախագահները հաստատել են խաղաղ ճանապարհով արցախյան հակամարտության կարգավորմանը տրամադրվածությունը։
Հանդիպման արդյունքների մասին Կրեմլի կայքում հրապարակված տեքստում ասվում է նաև, որ Պուտինը և Սարգսյանն ընդգծում են պայմանավորվածությունների իրագործման կարևորությունը, որոնք ձեռք են բերվել 2016թ-ին Վիեննայում և Սանկտ Պետերբուրգում կայացած գագաթաժողովներում։ Այդ պայմանավորվածություններն ուղղված են հակամարտության գոտում իրավիճակի թեժացման անթույլատրելիությանը, իրավիճակի կայունացմանը և խաղաղ գործընթացի առաջխաղացման համար պայմանների ստեղծմանը։
«Նրանք բարձր են գնահատել ջանքերը, ոոնք ձեռնարկել են ԵԱՀԿ Մինսկի խմբի համանախագահները` հակամարտության խաղաղ կարգավորմանն աջակցելու համար», — նշվում է հայտարարությունում։
