Աբովյանի և Հին Երևանցու փողոցների (նախկինում՝ Աստաֆյան և Լալայանց) անկյունում է գտնվում ԱՕԿՍ-ի՝ Արտասահմանյան երկրների հետ մշակութային կապի և համագործակցության հայկական ընկերության շենքը, իսկ մինչև 1923 թվականը այստեղ է տեղակայված եղել Երևանի առաջին մասնավոր վիրաբուժական հիվանդանոցը:
Սրբատաշ սև տուֆից երկհարկանի շենքը կառուցվել է 1914-1915 թվականներին տաղանդաշատ ճարտարապետ Բորիս Մեհրաբյանի նախագծով և նրա ճարտարապետական ժառանգության լավագույն նմուշն է համարվում: Աջակողմյա և ձախակողմյա հատվածներում երկու գմբեթներ ունեցող սլացիկ այս շինությունը եզակի է համարվում Հին Երևանից դեռևս պահպանված ճարտարապետական հուշարձանների շարքում՝ և իր ծավալատարածական յուրօրինակ լուծումներով, և իր անկրկնելի դեկորատիվ հարթաքանդակներով:
![Улица Абовяна 3, здание АОКС-а. Старый Ереван Улица Абовяна 3, здание АОКС-а. Старый Ереван - Sputnik Արմենիա](https://cdn.am.sputniknews.ru/img/669/59/6695936_0:0:1068:1600_600x0_80_0_0_038bb37c4ffec3cd076c946d9ba7b790.jpg)
Շենքի պատվիրատուն և սեփականատերը եղել է բժիշկ-վիրաբույժ Հովհաննես Հովհաննիսյանը: Նա ծնվել է Երևանում 1865 թվականին ՝ վաճառականի ընտանիքում: Ավարտելով Երևանի արական գիմնազիան, Հովհաննիսյանը շարունակել է ուսումը Խարկովի և Մոսկվայի համալսարաններում՝ ստանալով բարձրագույն բժշկական կրթություն: Հետագայում վիրաբուժության գծով մասնագիտացել է Վիեննայում, Բեռլինում, Փարիզում և Մոսկվայում: 1895-ին Երևանի քաղաքային գործադիր մարմնի (ուպռավայի) հրավերով նա վերադառնում է հայրենիք և մինչեւ 1907-ը աշխատում է որպես քաղաքային հիվանդանոցի տնօրեն:
Բժշկական աշխատանքին զուգահեռ՝ Հովհաննես Հովհաննիսյանը նաև ակտիվ հասարակական գործունեություն է ծավալել, մասնավորապես՝ եղել է Երևանի քաղաքային խորհրդի (դումայի) պատգամավոր և Կովկասի հայկական բարեգործական միության Երևանի բաժանմունքի նախագահը: 1911-ին, թողնելով պետական աշխատանքը, Հովհաննիսյանը բացում է քաղաքի առաջին մասնավոր վիրաբուժական կլինիկան` սկզբում վարձակալած տարածքում, իսկ 1915-ից այն տեղափոխվում է արդեն իր նորակառույց երկհարկանի առանձնատունը՝ ներկայիս Աբովյան 3 շենքը: Հիվանդանոցային սենյակները գտնվում էին շենքի առաջին հարկում, իսկ երկրորդ հարկը բնակելի տարածք էր հանդիսանում, որտեղ ապրում էր բժիշկը:
Հովհաննես Հովհաննիսյանի հիվանդանոցի շենքը 1923-ին պետականացվում է, որից հետո, 1923-1944 թվականներին, այս շենքում է տեղակայվում Հայաստանում առաջին Տրոպիկական ինստիտուտը կամ, ինչպես ընդունված էր ասել, «Մալարիայի հիվանդանոցը»: ԱՕԿՍ ընկերությունը այստեղ է սկսում գործել 1944 թվականից, իսկ 1960-ականներին այս նույն շենքում գործել է նաև Հայկական ԽՍՀ Արտաքին գործերի նախարարության գրասենյակը:
![Աբովյան 3 հասցեում գտնվող շենքը Աբովյան 3 հասցեում գտնվող շենքը - Sputnik Արմենիա](https://cdn.am.sputniknews.ru/img/669/61/6696128_0:1:1600:1068_600x0_80_0_0_dec49a3787d6186699edd7d4489cf738.jpg)
![Աբովյան 3 հասցեում գտնվող շենքը Աբովյան 3 հասցեում գտնվող շենքը - Sputnik Արմենիա](https://cdn.am.sputniknews.ru/img/669/60/6696062_0:63:1599:1068_600x0_80_0_0_9918ecfe37f95c1c55335dc91620213e.jpg)
![Հին Երևանի կանգուն վկաները Հին Երևանի կանգուն վկաները - Sputnik Արմենիա](https://cdn.am.sputniknews.ru/img/669/58/6695809_0:0:1599:1005_600x0_80_0_0_f7f4577723136299228933b5ae752404.jpg)
![Աբովյան 3 հասցեում գտնվող շենքը Աբովյան 3 հասցեում գտնվող շենքը - Sputnik Արմենիա](https://cdn.am.sputniknews.ru/img/669/56/6695630_0:0:1599:1004_600x0_80_0_0_809c8ab8343e467dfcb3d1274c535fe6.jpg)
![Աբովյան 3 հասցեում գտնվող շենքը Աբովյան 3 հասցեում գտնվող շենքը - Sputnik Արմենիա](https://cdn.am.sputniknews.ru/img/669/55/6695516_0:59:1599:1064_600x0_80_0_0_0ac8727a46583fead6b4d5ee21834f15.jpg)
![Աբովյան 3 հասցեում գտնվող շենքը Աբովյան 3 հասցեում գտնվող շենքը - Sputnik Արմենիա](https://cdn.am.sputniknews.ru/img/669/54/6695457_0:0:1597:1064_600x0_80_0_0_6a40b35a40b0e1c5c04ee425250da975.jpg)
![Աբովյան 3 հասցեում գտնվող շենքը Աբովյան 3 հասցեում գտնվող շենքը - Sputnik Արմենիա](https://cdn.am.sputniknews.ru/img/669/53/6695338_0:0:1599:1065_600x0_80_0_0_cca2c8c8249dd239b82c317fb908b1cd.jpg)