ԵՐԵՎԱՆ, 15 մարտի — Sputnik. Թղթակից Ալեքսեյ Բարանովի սյուժեն` ահաբեկիչներից ազատագրված Հալեպում կյանքը բնական հունի մեջ մտնելու մասին, Ռոսիա-1 հեռուստաալիքի եթերում հեռարձակվել է անցած հանգստյան օրերին, Դմիտրի Կիսելյովի «Վեստի նեդելի» ամփոփիչ ծրագրի շրջանակում։
«Նրանք շատ համախմբված են, մինչև հիմա ապրում են իրենց նախնիների թաղամասերում, սերտորեն շփվում են միմյանց հետ և փորձում պահպանել իրենց մշակույթը», — այդպես է բնութագրել Հալեպի հայերին Sputnik Արմենիայի թղթակցի հետ զրույցում Ալեքսեյ Բարանովը։
Պատահական չէ, որ լրագրողն իր ռեպորտաժի համար գլխավոր հերոսներ ընտրել է Հալեպի հայերին, քանի որ հայկական համայնքը Սիրիայի ամենամեծ համայնքներից է։ Հայերն այստեղ ամենուրեք են` խանութներից մինչև պետական կարևոր պաշտոններ։
Բարանովի կարծիքով` սիրիահայերը համախմբված են և հայրենասեր։ Գրեթե յուրաքանչյուրի մոտ կարելի է գտնել Արարատ լեռան լուսանկարը, մայրենի լեզվով գրքեր և այլն։
«Շատերը պահպանում են կապը Հայաստանի ազգականների հետ, հաճախ են այցելում իրենց պատմական հայրենիք` նրան ավելի լավ ծանոթանալու համար», — ասում է Բարանովը։
Հալեպի հայերը սիրում են իրենց քաղաքը, բայց չեն մոռանում արմատների մասին, ուստի հետևում են Հայաստանում կատարվող իրադարձություններին։ Սյուժեի հեղինակն ընդգծում է, որ սիրիահայերը մեծ երախտագիտությամբ են ընդունել Հայաստանից առաքված մարդասիրական օգնությունը։ Հերթական մարդասիրական բեռը Երևանից Հալեպ է տեղափոխվել մեկ ամիս առաջ։
Բարանովը նշում է, որ հայերն ամեն ինչ անում են` կիսավեր, բայց դեռ չքնաղ քաղաքը վերականգնելու համար։ Հալեպը չլքած հայերը հիմնական զբաղվում են արհեստներով։
«Հնագույն Հալեպն իրենց համար հարազատ է, նրանք դարեր շարունակ ապրում են այստեղ և չեն պատրաստվում հեռանալ։ Ասում են, որ այդ ամենը վերականգնվելու է», — նշել է Բարանովը։
Զարմացնում է նաև, որ շատ հայեր, հատկապես միջին և ավագ տարիքի, արաբերենից և հայերենից բացի հիանալի տիրապետում են ռուսերենին. Հալեպի որոշ դպրոցներում մինչև հիմա ռուսաց լեզուն ներառված է կրթական ծրագրում։
