ԵՐԵՎԱՆ, 12 մարտի — Sputnik. Հայաստանում քարոզարշավ գոյություն չունի, սկսվել է առք ու վաճառքը, գոյություն ունի քարոզարշավի իմիտացիա։ Երեքշաբթի լրագրողներին ասաց «Բարգավաճ Հայաստան» կուսակցության թեկնածու Լյովա Խաչատրյանը։
Նրա խոսքով` Հայաստանում չափազանց քիչ քաղաքական ուժեր կան, որոնք գործուղումների ընթացքում ներկայացնում են իրենց նախընտրական ծրագրերը։
«Ընտրությունների մասնակիցների շարքում «Բարգավաճ Հայաստան» կուսակցությունն է։ Մեզ մոտ հավաքներն ինքնաբուխ են՝ գալիս են, իրենց խնդիրներն են բարձրաձայնում, ասում են փրկեք՝ միակ հույսը դուք եք, Ծառուկյանին ասում են՝ փրկեք, միակ փրկությունը դուք եք», — ասաց նա։
Խաչատրյանի խոսքով` նախընտրական շրջանում չի կարելի խոսել իշխանափոխության մասին, քանի որ նույնիսկ գործող իշխանությունները ժամանակավոր են։
ՀՅԴ Երևանի քաղաքային կոմիտեի ներկայացուցիչ Բագրատ Եսայանը համաձայն չէ այն կարծիքի հետ, որ քաղաքական ուժերը նախընտրական ծրագրեր չունեն։ Նրա խոսքով` կուսակցություններն ու դաշինքները քարոզարշավ են անցկացնում իրենց ուժերի և հնարավորությունների շրջանակում։
«Ինչ-որ մեկը քարոզչություն է իրականացնում հեռուստատեսությամբ, մյուսը մեկ այլ ուղի է ընտրում։ Կարծում եմ, որ հիմա քաղաքական ուժերը ներկայացնում են տարբեր նախընտրական ծրագրեր։ Եթե Հայաստանում կա իրական քաղաքական ուժ, ապա դա «Դաշնակցությունն» է»։ Մենք կարող ենք խոստանալ, որ կենսաթոշակները կբարձրանան մի քանի անգամ։ Բացի այդ, եթե քաղաքացիները մեզ են տվել իրենց ձայները, ապա մենք պատասխանատու ենք նրանց առաջ», — ասաց Եսայանը։
Նրա կարծիքով` «այս տարի ընտրություններն իներտ կլինեն»։ Միևնույն ժամանակ, ըստ նրա, հինգ տարի անց դրանք ավելի քաղաքականացված կլինեն։
Հայաստանի Ազգային ժողովի ընտրությունները կկայանան ապրիլի 2-ին։
