ԵՐԵՎԱՆ, 14 մարտի — Sputnik. Տնտեսագետ Աշոտ Թավադյանը կարծում է, որ ԱՊՀ երկրների ասոցացված անդամակցությունը կարող էր առևտրային և միգրացիոն մի շարք խնդիրներ լուծել: Այս մասին նա խոսեց Sputnik Արմենիա մամուլի կենտրոնում Երևան — Մոսկվա — Աստանա — Բաքու — Բիշքեկ — Քիշնև — Մինսկ տեսակապի ժամանակ, որի ընթացքում բանախոսները քննարկեցին «ԱՊՀ երկրների տնտեսական օրակարգի» թեման։
«Պետք է ոչ միայն հաշվի առնել բոլոր երկրների շահերը, այլ նաև կոնսենսուսի բերել, ինչ-որ բան զոհաբերել» — նշեց Թավադյանը` առաջարկելով ԱՊՀ երկրներին հաշվի առնել ԵԱՏՄ աշխատանքային փորձը, որի շնորհիվ կառույցն աստիճանաբար լուծում է իր առջև դրված խնդիրները:
«Ինչո՞ւ ԱՊՀ երկրները չդառնան ԵԱՏՄ ասոցացված անդամներ: Կարծում եմ` դա կլուծի առևտրային շրջանառության աճի և արտագաղթի խնդիրները»,– ասաց Թավադյանը:
Նա նշեց, որ դրան զուգահեռ պետք է պայքարել նաև կաշառակերության դեմ, որի մակարդակը բավական բարձր է ԱՊՀ բոլոր երկրներում: Ըստ նրա` այդ պատճառով է, որ ապրանքները 10-15% ավելի թանկ են, ինչն ազդում է երկրների փոխհարաբերությունների և մրցունակության վրա:
Թավադյանի կարծիքով` դժվար կլինի հաջողության հասնել` առանց բոլոր երկրների ներուժը գումարելու, մանավանդ փոքր երկրների համար:
Փորձագետը նշեց, որ տեղեկատվական տեխնոլոգիաները, ատոմային էներգետիկան և ինովացիոն ուղղություններն այն ոլորտներն են, որտեղ ԱՊՀ երկրները կարող են հաջողության հասնել:
