ԵՐԵՎԱՆ, 14 մարտի — Sputnik. ԱՊՀ Տնտեսական խորհրդի` մարտի 17-ին Մոսկվայում կայանալիք նիստի հիմնական թեմաներից մեկը կլինի Ղազախական նյութագիտական տոկամակի շինարարության և օգտագործման հարցը, Sputnik Արմենիա մամուլի կենտրոնում ասաց ԱՊՀ Գործադիր կոմիտեի տնտեսական համագործակցության բաժնի ղեկավար Անդրեյ Կուշնիրենկոն։
«ԱՊՀ բոլոր մարմինները ջանքեր են գործադրում, որպեսզի օրակարգը գործնական և հագեցած լինի։ Բովանդակությունը բավական հետաքրքիր է։ Հիմնականում նվիրված կլինի գիտական-նորարարական հարցերին, տնտեսության հետ կապերին», — ասաց Կուշնիրենկոն։
Նրա խոսքով` մանրամասն կքննարկվի այն հարցը, թե ինչպես կօգտագործվի և ինչպիսին կլինի Ղազախական նյութագիտական տոկամակի վրա աշխատանքների համատեղ ծրագիրը։ Դա ջերմամիջուկային ռեակտորի, էներգիայի աղբյուրի նոր տեսակի նախատիպ է։
«Ջերմամիջուկային ռեակտորը պետք է ստեղծվի բոլոր երկրների համատեղ ջանքերով, դա մի երկրում անելը շատ թանկ է, իսկ ընդհանուր ջանքերը կմոտեցնեն իրագործման ժամկետները», — ասաց Կուշնիրենկոն։
Բացի այդ, նրա խոսքով` կքննարկվի ռադիոնավիգացիայի համատեղ աշխատանքների ծրագիրը, ընդհանուր աշխատաշուկայի աստիճանական ձևավորման հայեցակարգը։ Կուրչատով քաղաքում կառուցվող նյութագիտական տոկամակն առաջին սարքն է` նախատեսված ջերմամիջուկային նյութագիտության հետազոտություններ անցկացնելու համար։ Այդ սարքով ստացված արդյունքները կօգնեն նոր նյութեր ստեղծել էներգետիկ ջերմամիջուկային ռեակտորների համար։
