ԵՐԵՎԱՆ, 13 մարտի — Sputnik. Հայաստանը համաշխարհային հանրությանը պետք է ցույց տա, որ ինքը կարող է կարևոր դերակատարում ունենալ տարածաշրջանային խնդիրների լուծման մեջ, Sputnik Արմենիային ասաց արաբագետ Արմեն Պետրոսյանը` ամփոփելով Երևանում կայացած «Վալդայ» միջազգային բանավիճային ակումբի արտագնա նիստը։
«Եթե վերցնենք տարբեր տարածաշրջանային կոնֆլիկտներ, ապա Հայաստանն, այսպես, թե այնպես, ներգրավված է դրացում։ Էլ չեմ խոսում արցախյան խնդրի մասին, որտեղ մենք հատուկ առաքելություն ունենք։ Սիրիայի և Իրաքի կոնֆլիկտների կարգավորման հարցում Հայաստանը ոչ ակտիվ, բայց կարևոր դերակատարում ունի։
Օրինակ` մենք Սիրիայում ունենք մեծ համայնք, արաբական այդ երկրի հետ պատմականորեն կապված ենք և լավ հարաբերություններ ունենք։ Հենց դրանում արդեն ի հայտ է գալիս մեր դերակատարումը»,-ասաց արաբագետը։
Նրա խոսքով` հայկական կողմն իր ներդրումն է ունենում խնդրի կարգավորման հարցում, հատկապես, սիրիական ճգնաժամի հետ կապված` ուղարկելով այնտեղ հումանիտար օգնություն, նաև բարձրացնելով սիրիահայերի խնդիրը միջազգային հարթակներում։
Ըստ Պետրոսյանի` Հայաստանը, լինելով ԵԱՏՄ անդամ երկիր, կապող օղակ կարող է դառնալ ԵԱՏՄ-ի և տարածաշրջանի մյուս խաղացողի` Իրանի հետ։ Բացի այդ` Հայաստանը կարող է նաև կապել Եվրոպան ու Իրանի հոտ։ Այնպես որ, մեր երկիրն, այս կամ այն կերպ, կապ ունի տարածաշրջանային բոլոր խնդիրների հետ։
Փորձագետը վստահ է, որ փոքր երկրները պետք է գիտակցեն իրենց կշիռն ու ակտիվորեն ցույց տան իրենց դերը տարածաշրջանում։
