ԵՐԵՎԱՆ, 18 փետրվարի — Sputnik. Ռուսական Իլ-76 երկրորդ ինքնաթիռը՝ Հալեպի բնակիչների համար նախատեսված մարդասիրական բեռով, ուղևորվեց Սիրիա։
«Մոտավորապես 20 տոննա բեռ է ուղարկվում, որի մեջ կա պարենամթերք, հագուստ, քնապարկեր, բժշկական պարագաներ։ Ինքնաթիռը բեռը կհասցնի Լաթաքիա, որից հետո ռուսական պահակախմբի ուղեկցությամբ կտեղափոխի Հալեպ», — լրագրողներին ասաց Հայաստանի ԱԻՆ ղեկավար Դավիթ Տոնոյանը։
Նախարարի խոսքով` նոր առաքումները պայմանավորված են Սիրիայի հայ համայնքի կարիքներով։
Սփյուռքի նախարար Հրանուշ Հակոբյանն իր հերթին նշեց, որ 4 ամսվա ընթացքում ռուս-հայկական համագործակցության շնորհիվ Սիրիա է ուղարկվել 4 ինքնաթիռ` մարդասիրական բեռով։
«Բեռի կարևորությունը ոչ այնքան նյութական արժեքն է, որքան բարոյական նշանակությունը։ Սիրիահայերը զգում են, որ Հայաստանն իրենց կողքին է», — ասաց Հակոբյանը։
Նրա խոսքով` բեռը կբաժանվի ոչ միայն հայերին, այլ նաև սիրիացիներին։
Նա նշեց, որ օգնություն տրամադրելու գործում անմասն չեն մնում նաև այլ երկրների հայերը։ Այսպես, Կրասնոդարի հայերը Սիրիա են ուղարկել ալյուր, որով հաց են թխել և բաժանել Սիրիայի բնակիչներին։
Նախարարը Սիրիայի ժողովրդին մաղթեց համբերություն և շուտափույթ խաղաղություն։
Օգնության առաջին մասը` 18,5 տոննա քաշով, Ռուսաստանի ավիացիայի ռազմատրանսպորտային ավիացիայի ինքնաթիռը մի քանի օր առաջ Հայաստանից տեղափոխել էր «Հմեյմիմ» ավիաբազա։ Այդ ինքնաթիռում եղել էր 20 անուն պարեն` հյութեր, պահածոյացված մրգեր, մուրաբա, մսի պահածոներ։
2016թ-ի աշնանը Հայաստանի նախագահ Սերժ Սարգսյանի կարգադրությամբ երկու ինքնաթիռներ Հայաստանից Սիրիա են առաքել 40 տոննա ծավալով մարդասիրական օգնության առաջին խմբաքանակը։
