ԵՐԵՎԱՆ, 13 մարտի —Sputnik. ՀՀ վարչապետ Կարեն Կարապետյանը նշեց, որ իրենք ներկայացրել են բավականին համալիր ծրագիր։ Այն, ընդհանուր առմամբ, չորս հարցի է պատասխանում՝ որտեղ ենք և ինչ խնդիրներ ունենք, ուր ենք ուզում հասնել, ինչ պետք է անենք դրա համար և ով պետք է անի:
«Ծրագիրը, թեպետ, բավականին ամբիցիոզ է, հավակնոտ, բայց միաժամանակ իրատեսական։ Մենք բոլոր ոլորտներում արդյունավետությունը բարձրացնելու խնդիր ունենք»,- ասաց վարչապետը` նշելով, ոչ ՀՀԿ նախընտրական ծրագիրը վերաբերում է բոլոր ոլորտներին:
Պատասխանելով քաղաքացիների աշխատավարձերի, կենսաթոշակների բարձրացմանը վերաբերող հարցերին`Կարեն Կարապետյանը նշեց, որ նախ պետք է տնտեսությունը զարգացնել, աշխատատեղեր ստեղծել:
«Մենք բավականին մեծ բարեփոխումներ ենք ծրագրել սոցիալական, առողջապահության ոլորտներում։ Դրա հիմնական նպատակը հետևյալն է` մենք չենք լուծում բոլոր սոցիալական խնդիրները, որոնք կան սոցիալապես անապահովների մոտ, բայց նույնիսկ այս պարագայում, սուղ պայմաններում մենք ունենք պրոբլեմներ, որ էֆեկտիվ չենք այդ գումարները ծախսում և մեկ-մեկ հասցեն սխալ ենք ընտրում»։ Վարչապետի խոսքով` բոլոր ոլորտներում համակարգային այնպիսի մեծ բարեփոխումներ պետք է իրականացնել, որոնք հնարավորություն կտան նույն բյուջեի պարագայում ավելի որակյալ ծառայություն մատուցել և դաշտը 20-30 անգամ մեծացնել:
