Ռուսաստանցի հաղորդավոր, ռեստորատոր և բրենդ-շեֆ Գայանե Բրեիովան Sputnik Արմենիային պատմեց, թե ինչպես է «կառավարում» իր տրամադրությունը և որտեղից է ոգեշնչման աղբյուր գտնում: Զրուցեց Լիլիթ Հարությունյանը:
- Հայտնի է, որ սկսվել եք մատուցողի աշխատանքից: Ո՞ր որակներն են Ձեզ օգնել հաղթահարել բոլոր արգելքները և հաջողության հասնել:
— Աշխատասիրություն, աշխատասիրություն և ևս մեկ անգամ աշխատասիրություն, բայց այն չպետք է հարկադրված լինի: Հակառակը՝ դու քո աշխատանքն ուրախությամբ և երախտագիտությամբ պիտի անես: Չպետք է խղճաս քեզ և հետևողական լինես ամենօրյա գործողություններիդ: Սովորելը նույնպես շատ կարևոր է. դու պետք է ամեն օր կլանես նոր գիտելիքներ և յուրացնես գործընկերներիդ հմտությունները:
- Որտեղի՞ց եք ուժ և ոգեշնչում գտնում այն պահերին, երբ որևէ բան անելու ցանկություն չկա:
— Իսկ ես չեմ վիճում իմ բնավորության հետ, տարիքի հետ սկսում եմ սիրել այն՝ ցանկացած դրսևորման մեջ և սովորում եմ պայմանավորվել նրա հետ:Ես պատրաստ եմ ամեն օր արարել, ուրախ լինել դրանով:
- Կարծիք կա, որ յուրքանչյուր հաջողակ կնոջ հետևում ոչ պակաս հաջողակ տղամարդ է կանգնած: Կարելի՞ է ասել, որ Ձեր օրինակը հերքում է այս պնդումը:
— Իմ դեպքում կարելի է ասել՝ իմ կողքին եղել է տղամարդ, որը չի խանգարել: Ինչպես ասում են բժիշկները՝ գլխավորը չվնասելն է: Հավատացեք, դա պակաս կարևոր չէ, քան ֆինանսական օգնությունը: Ամուսինս եվրոպացի է, նա սովորեցրել է ինձ, որ հրաշքներ չեն լինում: Անհնար է կիսով չափ հղի լինել, դու կամ հղի ես կամ ոչ: Այսինքն, եթե դու ուզում ես զբաղվել բիզնեսով, բարի եղիր քեզ վրա պատասխանատվություն վերցնել, այդ թվում՝ ֆինանսական:
- Ինչպե՞ս կբացատրեք այն պարադոքսը, որ հիմնականում ուտելիք պատրաստում են կանայք, բայց լավագույն խոհարարները սովորաբար տղամարդիկ են:
— Օ, այո, տղամարդիկ ավելի լավ են պատրաստում, քան կանայք: Եվ դա հիանալի է, թող պատրաստեն: Պատկերացրեք, սիրելի կանայք, դուք գալիս եք ռեստորան և գիտեք, որ ձեզ սպասարկում են հիանալի տղամարդիկ, պատրաստում են ձեզ համար, մի՞թե դա հրաշք չէ (ծիծաղում է):
- Ո՞րն է Ձեր սիրելի ճաշատեսակը:
— Դրանք շատ են, չափազանց շատ: Ես ամենակեր եմ (ժպտում է):
- Ինչպե՞ս է հաջողվում գործարար կնոջը համատեղել կարիերան ընտանիքի հետ:
— Երբեմն ես ինքս զարմանում եմ, թե ինչու են աղջիկներս ինձ շարունակում մայր կոչել (ժպտում է): Իրականում ես հիանալի մայր եմ, և օրինակ եմ ծառայում աղջիկներիս համար: Ես սովորեցնում եմ նրանց լսել իրենց սրտի թելադրանքը, վստահ լինել, որ ծնվել են երջանիկ լինելու, զարգանալու և ներդաշնակության մեջ ապրելու համար: Ես և ամուսինս բաժանված ենք, բայց ոչ այն պատճառով, որ ես շատ եմ աշխատում, պարզապես որոշակի պահի մեր հարաբերությունները սպառել էին իրենց, մենք դադարել էինք նայել նույն ուղղությամբ, իսկ դա շատ կարևոր է:
- Դուք շատ եք ճանապարհորդում: Հետաքրքիր է իմանալ՝ ո՞ր քաղաքում եք Ձեզ զգում ինչպես տանը:
— Երևանը լավագույն է, ինչ կա իմ կյանքում: Ես ծնվել և մեծացել եմ Երևանում և սրտի թրթիռով եմ վերաբերվում նրան, թանկ եմ գնահատում մեր հարաբերությունները, այն իմ ուսուցիչն է, իմ ընկերը և մեր միջև փոխադարձ սեր կա:
- Մտածու՞մ եք, արդյոք, երբևէ հայրենի քաղաք վերադառնալու մասին:
— Ես սովորում եմ ապրել այսօրվա օրով, այսօրը պակաս կարևոր չէ, քան վաղը, ես կասեի ավելի կարևոր է, քանի որ դա մեր միակ իրականությունն է: Այսօր ես Մոսկվայում և ինձ լավ եմ զգում այստեղ:
- Ինչպե՞ս եք գնահատում Հայաստանի ռեստորանային ոլորտը:
— Գիտեք՝ ես կարծում եմ, որ Հայաստանում շատ հետաքրքիր նախագծեր կան՝ լավ հայեցակարգերով: Երևանում հաստատ ցույց տալու և հպարտանալու բաներ կան: Բայց պետք է լինեն նաև ճիշտ դպրոցներ, որտեղ կսովորեցնեն ռեստորանային վարպետություն:
- Ունե՞ք, արդյոք, Հայաստանի հետ կապված բիզնես նախագծեր:
— Տվյալ պահին չունեմ, և դա իմ գիտակցված ցանկությունն է: Հենց սկսում եմ աշխատել հայրենքիում, կորցնում եմ հանգստանալու և վերականգնվելու հմտությունը, իսկ այդ առումով ես շատ ունեմ Հայաստանի կարիքը: Ինձ համար կարևոր է «հողանցվել» և լրացնել էներգիաս: Ես իմ պարտքը Երևանին վերադարձնում եմ նրանով, որ փորձում եմ բոլոր հնարավոր և անհնար միջոցներով տեղեկացնել նրա մասին, ծանոթացնել պատմության և խոհանոցի միջոցով, որ բոլորը սիրահարվեն Հայաստանին և հայերին:
Երևանում բիզնես նախագիծ ունի. ես երկու տարի շարունակ «Երևանի լավագույն ռեստորան» մրցանակաբաշխությունն էի կազակերպում՝ տարբեր անվանակարգերում: Դա շատ հիանալի և լայնածավալ նախագիծ էր, ինչպես ես սիրում եմ: Բայց, ինչպես ասացի, հենց այդ հանգամանքն ինձ հետ պահեց հետագա գործողություններից: Մյուս կողմից, ես միշտ բաց եմ նոր նախագծերի համար, այնպես որ, բարեկամնե՛ր, առաջարկե՛ք:
- Ի՞նչ կմաղթեք Հայաստանի կանանց:
— Համարձակություն, համարձակություն սեփական ձայնը լսելու և ինքն իր հետ ներդաշնակ լինելու համար: Մեր կյանքն, անձնականը կյանքը անգին է:
