ԵՐԵՎԱՆ, 11 մարտի — Sputnik. Ռուսաստանը ոչ մի դեպքում ոչ մի գործողություն չի ձեռնարկի, որը կարող է վնաս հասցնել Հայաստանին, ասաց Ռուսաստանի գիտությունների ակադեմիայի Արևելագիտության ինստիտուտի գիտական ղեկավար Վիտալի Նաումկինը «Վալդայ» ակումբի միջազգային բանավիճային ակումբի «Փոփոխությունների ժամանակը. աշխարհը գլոբալ անկանխատեսելիության դարաշրջանում» արտագնա նիստում:
«Ադրբեջանին զենք վաճառելը շատ սուր հարց է, այն երբեմն տարակուսանք է հարուցում հայ ընկերների մոտ: Բայց, անկեղծ ասեմ, մենք ապրում ենք հետխորհրդային տարածքում, որտեղ Ռուսաստանի ռազմավարական գիծն այդ տարածքի բոլոր երկրների հետ բարեկամական հարաբերություններ ունենալն է», — ասաց Նաումկինը:
Նրա խոսքով՝ Ռուսաստանն չի կատարի այնպիսի գործողություններ, որոնք կարող են վնասել Հայաստանին: Փորձագետը դա լիովին բացառում է:
«Շուկայում կարելի է գնել ցանկացած զենք, ինձ թվում է՝ Ռուսաստանի և Ադրբեջանի միջև կա ռազմաքաղաքական համագործակցություն, ոչ ոք դա չի հերքում, բայց դա զսպող գործոն է», — ասաց Նաումկինը: Նրա կարծիքով՝ Ռուսաստանը ձգտում է, որպեսզի այն ամեն դեպքում չօգտագործվի Հայաստանի և Արցախի ժողովրդի դեմ:
