ԵՐԵՎԱՆ, 11 մարտի — Sputnik. Ռուսաստանի հետ դաշինքը Հայաստանի արտաքին քաղաքականության հիմնարար բաղադրիչներից է, ասաց Հայաստանի պաշտպանության նախարար Վիգեն Սարգսյանը Երևանում «Վալդայ» միջազգային բանավիճային ակումբի «Փոփոխությունների ժամանակը. աշխարհը գլոբալ անկանխատեսելիության դարաշրջանում» արտագնա նիստում:
«Տարածաշրջանային մակարդակում փոխազդեցության առումով, բնականաբար, մեր արտաքին քաղաքականության կարևոր բաղադրիչը Ռուսաստանի հետ ռազմավարական միությունն է, որն ամրագրված է մի շարք երկկողմ փաստաթղթերով և տարածաշրջանային կազմակերպություններով, որոնց ակտիվ մասնակցում է Հայաստանը», — ասաց Սարգսյանը:
Նա նշեց, որ Հայաստանը, գնահատելով տնտեսական և ֆինանսական ոլորտները, որոշում է կայացրել մտնել ԵԱՏՄ, քանի որ դա ավելի արդյունավետ է, քան Եվրամիության հետ համաձայնագրի ստորագրումը: Մասնագետները, այդ թվում՝ Եվրամիության ներկայացուցիչները, համապատասխան հաշվարկներ են արել: Սարգսյանի կարծիքով՝ դա չի խոչընդոտում Եվրամիության և այլ երկրների հետ հարաբերությունների խորացմանը:
Նախարարը նշեց, որ Հայաստանը ՀԱՊԿ համահիմնադիրներից է և շատ լուրջ է վերաբերում այդ ինտեգրացիոն միավորման հարցերին: Անցած տարի Հայաստանի նախագահության շրջանում հենց նրա նախաձեռնությամբ է ընդունվել ՀԱՊԿ անվտանգության ռազմավարությունը: Դա կհանգեցնի կազմակերպության զարգացմանը և աշխարհում նրա դերի ամրապնդմանը, ենթադրում է Հայաստանի պաշտպանական գերատեսչության ղեկավարը: Միաժամանակ, Հայաստանն ակտիվ համագործակցություն է ծավալում է ՆԱՏՕ-ի «Գործընկերություն հանուն խաղաղության» ծրագրի շրջանակում:
