ԵՐԵՎԱՆ, 11 մարտի — Sputnik. Լեռնային Ղարաբաղը հռչակել է իր անկախությունը ինքնորոշման իրավունքի շրջանակում՝ ամրագրված ինչպես ՄԱԿ կանոնադրությամբ, այնպես էլ նախկին խորհրդային օրեսնդրությամբ, ասաց Հայաստանի պաշտպանության նախարար Վիգեն Սարգսյանը Երևանում «Վալդայ» միջազգային բանավիճային ակումբի «Փոփոխությունների ժամանակը. աշխարհը գլոբալ անկանխատեսելիության դարաշրջանում» արտագնա նիստում:
«Հայաստանն արդեն 29 տարի է ներքաշված է Արցախի ժողովրդի անվտանգության ապահովման մեջ: Ի պատասխան իր ինքնորոշման իրավունքի՝ Արցախը հանդիպել է կոշտ ագրեսիայի: Այդ իրավունքն առկա է ՄԱԿ կանոնադրությունում և եղել է խորհրդային օրենսդրությունում, որը ենթադրել է ինքնորոշվելու, սեփական ճակատագիրը տնօրինելոււ հնարավորություն», — ասաց Սարգսյանը:
Նախարարի խոսքով՝ հենց այդ օրենսդրության շրջանակում, ինքնավար Լեռնային Ղարաբաղն իրագործել է իր իրավունքը, որից հետո նրա դեմ ուժ են կիրառել: Հայաստանն այդ պայմաններում, պաշտպանելով Լեռնային Ղարաբաղի ժողովրդի գոյության իրավունքը, ներքաշվել է հակամարտության մեջ:
Վիգեն Սարգսյանը նշեց, որ չնայած սպառազինությունների, ժողովրդագրական ցուցանիշների տարբերությանը, Արցախը կարող է պաշտպանել իր անկախությունը, ձևավորել պետական իշխանության հստակ համակարգ, իրագործել կանոնավոր ընտրություններ, ինչպես վերջին հանրաքվեն էր:
Արցախը տնտեսական զարգացում է ապրում, մարդկանց իրավունքները պաշտպանված են: Դա որակապես տարբերվում է նրանից, ինչը, Սարգսյանի խոսքով, փորձում են պարտադրել Ադրբեջանում:
