ԵՐԵՎԱՆ, 11 մարտի — Sputnik. Ամբողջ աշխարհի հայկական սփյուռքը կարող է օգնել Արևմուտքի և Ռուսաստանի հարաբերությունները բարելավելու հարցում, ասաց Ռուսաստանի գիտությունների ակադեմիայի Արևելագիտության ինստիտուտի գիտական ղեկավար Վիտալի Նաումկինը «Վալդայ» ակումբի միջազգային բանավիճային ակումբի «Փոփոխությունների ժամանակը. աշխարհը գլոբալ անկանխատեսելիության դարաշրջանում» արտագնա նիստում:
«Եթե հաշվի առնենք, որ Հայաստանի սահմաններից դուրս երեք անգամ ավելի շատ հայեր են ապրում, քան երկրում, ապա, անշուշտ, նրանք հզոր ուժ են: Արևմուտքում և Արևելքում ապրող հայ համայնքները ուժի գործոն են, Եվրասիական միության համար ազդեցության պաշար», — ասաց Նաումկինը:
Նրա խոսքով՝ չնայած որ Հայաստանը լավ հարաբերություններ ունի Արևմուտքի հետ, և ոչ միայն ԱՄՆ-ի, այլ նաև Եվրոպայի, Լատինական Ամերիկայի, Մերձավոր Արևելքի հայ սփյուռքը կարող է շատ օգտակար և կարևոր լինել ԵԱՏՄ երկրների տնտեսական համագործակցության զարգացման համար: Փորձագետի կարծիքով՝ սփյուռքահայերը կարող են ազդել ԵԱՏՄ անդամ երկրների և այն երկրների միջև փոխգործակցության հաստատման վրա, որտեղ ապրում են:
«Օրինակ, ԱՄՆ-ի և Ռուսաստանի միջև հարաբերությունները բարդ են, իսկ Ռուսաստանը եվրասիական զարգացման շարժիչ ուժն է: Հայկական սփյուռքը կարող է դրական ազդել երկու երկրների միջև համագործակցության հաստատման վրա՝ երկուսի համար ձեռնտու ուղղություններով», — ասաց Նաումկինը: Նրա խոսքով՝ ցանկալի կլիներ, որպեսզի հայ համայնքներն օգնեն բոլորին ապրել խաղաղ և կայուն:
