ԵՐԵՎԱՆ, 9 մարտի — Sputnik. 2016 թվականի դեկտեմբերի 10-ից երկու շաբաթը մեկ անգամ Բրյուսել-Երևան-Բրյուսել երթուղով ոչ կանոնավոր չվերթներ իրականացնող «Բրասելս Էյրլայնզ» ավիաընկերությունը կանոնավոր չվերթներ իրականացնելու թույլտվություն է ստացել: Այս մասին տեղեկացնում է ՀՀ Քաղավիացիայի վարչությունը։
![Состоялся первый рейс авиакомпании "Armenia" Ереван-Воронеж-Ереван - Sputnik Արմենիա](https://cdn.am.sputniknews.ru/img/582/58/5825875_0:78:1280:641_600x0_80_0_0_a6447494e3a9c3491620affe61247c74.jpg "Состоялся первый рейс авиакомпании "Armenia" Ереван-Воронеж-Ереван")
2017 թվականի ապրիլի 1-ից հունիսի 24-ը և սեպտեմբերի 9-ից հոկտեմբերի 28-ը «Բրասելս Էյրլայնզ» ավիաընկերությունը «Զվարթնոց» օդանավակայանից թռիչքներ կիրականացնի շաբաթական մեկ անգամ՝ կիրակի օրերին:
Ամռան ընթացքում շաբաթական 2 չվերթ կիրականացվի դեպի Բրյուսել։ 2017 թվականի հուլիս 1-ից սեպտեմբերի 2-ը «Զվարթնոց» օդանավակայանից չվերթները կիրականացվեն չորեքշաբթի և կիրակի օրերին:
Ամառային նավիգացիոն շրջանում չվերթների հաճախականությունն ավելացնում են նաև մի շարք այլ ավիաընկերություններ, մասնավորապես՝ «Աէրոֆլոտ»-ը, «Ավստրիական ավիաուղիներ»-ը, «Էյր Ֆրանս»-ը, «Ֆլայ Դուբայ»-ը, «Էյր Արաբիա»-ն, «Լոտ լեհական ավիաուղիներ»-ը և այլն:
Հիշեցնենք, որ ուղևորահոսքի աճին զուգահեռ չվերթների հաճախականությունն ավելացրել էին նաև «Պոբեդա»-ն, «Քաթար Էյրվեյզ»-ը և այլ ավիաընկերություններ:
