ԵՐԵՎԱՆ, 9 մարտի — Sputnik. Հայաստանի իշխանություններն աշխատում են հարմարավետ պայմաններ ստեղծել ինչպես սփյուռքի, այնպես էլ օտարերկրյա ներդրողների համար, Sputnik Արմենիային ասաց ֆինանսների նախարար Վարդան Արամյանը։
«Անկախ նրանից` ներդրողը սփյուռքահայ է, թե արտասահմանցի, կա ոսկե օրենք. պետք է ապահովել անհրաժեշտ միջավայր, որպեսզի նրանք իրենց հարմարավետ զգան քո տնտեսությունում։ Մակրոտնտեսական կայունությունը պարտադիր պայման է», — ասաց Արամյանը։
Նախարարը համեմատել է գործարար միջավայրը ֆուտբոլային դաշտի հետ, այն պետք է հավասար, հարթ լինի, որպեսզի խաղը կայանա։ Նրա խոսքով` նպատակը բիզնեսի համար անհրաժեշտ միջավայր, «հավասար դաշտ» ապահովելն է։
Երկրորդ կարևոր ասպեկտը բոլոր տնտեսվարող սուբյեկտների համար «խաղի» միանման կանոնների ապահովումն է։
«Յուրաքանչյուր ներդրող պետք է համոզված լինի, որ իր համար կգործեն նույն կանոնները, ինչ մյուսների համար։ Երբ մենք խոսում ենք մենաշնորհների դեմ պայքարի, մրցակցային դաշտ ստեղծելու մասին, խոսքը հենց այս մեխանիզմիների մասին է», — ասաց Արամյանը։
Արամյանի խոսքով` հասարակությունը կկարողանա հետևել «խաղին», հետևել, որպեսզի դաշտում բոլորը պահեն «խաղի» կանոնները։ Հենց «տրիբունների» աղմուկը պետք է օգնի դատավորին արձանագրել այն, ինչը վրիպել է նրա աչքից։
Նախարարի խոսքով` սփյուռքն ուշադիր հետևում է կառավարության գործողություններին։
«Վարչապետի` Մոսկվա կատարած այցի ժամանակ հայտնվել են նման քաղաքականության առաջին արձագանքները։ Թեև 3-4 ամիսների ընթացքում դժվար է արձանագրել զգալի արդյունքներ, սակայն սփյուռքահայերի մոտ վստահություն է առաջանում, որ մենք գնում ենք ճիշտ ճանապարհով», — ասաց Արամյանը։
Նրա կարծիքով` ներդրողներն իրենք պետք է օգնեն այս քաղաքականությունն իրականացնելու հարցում։
«Անձամբ վարչապետը կոչ է արել է չսպասել։ Մենք պատրաստ ենք լսել նրանց խորհուրդները, եթե գնում ենք սխալ ուղղությամբ։ Մենք արդեն տեսնում ենք նման նախաձեռնություններ, օրինակ, վերջին շրջանում մի կանադահայ մեզ առաջարկություն արեց լեռնահանքային արդյունաբերության ոլորտում», — ասաց Արամյանը։
Նա նշեց, որ հեռանկարում հիմնադրամ ստեղծելու գաղափար կա, որն ապագայում դուրս կգա Հայաստանի սահմաններից և կհաշվվի միջազգային կապիտալի շուկայում։
