ԵՐԵՎԱՆ, 9 մարտի – Sputnik. Հայաստանում պետական ֆինանսների կառավարման էլեկտրոնային համակարգի ներդրման համար Ռուսաստանը Հայաստանին կտրամադրի 8.2 մլն ԱՄՆ դոլարի չափով դրամաշնորհ: Sputnik Արմենիայի հետ հարցազրույցում, ներկայացնելով իր ռուսաստանյան այցի արդյունքները, ասաց ՀՀ ֆինանսների նախարար Վարդան Արամյանը:
«Իմ գործընկեր Անտոն Սիլուանովի հետ մենք ունեցանք շատ կառուցողական հանդիպում: Օրակարգն ամբողջությամբ փոխօգնության, փոխգործակցության մասին էր: Մեր ռուս գործընկերներն ամեն ինչում մեզ օժանդակում են»,- ասաց Արամյանը:
Նախարարը նշեց նաև, որ ռուսական կողմի հետ պայմանավորվածություն է ձեռք բերվել կարճ ժամանակահատվածում ստորագրել դրամաշնորհի տրամադրման մասին համաձայնագիրը։ Սակայն համակարգի ներդրման համար միայն ռուսական օժանդակությունը բավարար չէ: Ֆինանսների նախարարը տեղեկացրեց նաև, որ այն պետք է համակցվի ՀԲ-ից ստացվող վարկի հետ:
«Իհարկե, այդ համակարգը մեր հանրության համար կարող է անհասկանալի լինել, որովհետև դա խիստ մասնագիտական է: Կարճ ասեմ, որ դա այն էլեկտրոնային հարթակն է, որով մենք կարողանալու ենք բարձրացնել մեր պետական ֆինանսների կառավարելիության արդյունավետությունը, թափանցիկությունը, հաշվետվողականությունը, այսինքն` մեր հանրությունը կարողանալու է նաև ակտիվ կերպով հսկել, թե մեր հարկատուներից հավաքված ցանկացած գումար որտեղ և ինչպես է ծախսվում»,- ներկայացնելով պետական ֆինանսների կառավարման էլեկտրոնային համակարգի նշանակությունը` ասաց Արամյանը:
Ռուսական կողմի հետ պայմանավորվածություններ են ձեռք բերվել նաև ֆինանսների նախարարության մասնագետների մասնագիտական կարողությունների բարձրացման, փորձի փոխանակման ոլորտներում համագործակցելու վերաբերյալ:
«Այս մասով ռուս գործընկերները մեզ կօժանդակեն` ֆինանսավորելով մեր մասնագետների վերապատրաստումը ՌԴ-ում ու նույնիսկ երրորդ երկրում: Մենք պայմանավորվել ենք, որ ծրագիրը պետք է ունենա լայն շրջանակ, քանի որ Ռուսաստանն էլ մեզ պես զարգացող երկիր է, բայց կան որոշակի տիրույթներ, որտեղ կան ավելի առաջընթաց երկրներ, որոնց փորձն ավելի ուսանելի է»,- ասաց նախարարը:
Ի դեպ, ֆինանսական կառավարման բնագավառում կան այնպիսի ոլորտներ, որտեղ Հայաստանն առաջ է Ռուսաստանից: Որպես օրինակ Վարդան Արամյանը նշեց պետական պարտքի կառավարումը, մասնավորապես խնայողական պարտատոմսերի ներդրումը: Եթե Ռուսաստանում այս գործիքը բոլորովին վերջերս է ներդրվել, ապա Հայաստանն այդ արել է դեռևս 10 տարի առաջ:
