ԵՐԵՎԱՆ, 8 մարտի — Sputnik. Դոնի Ռոստովի «Օլիմպ-2» մարզադաշտում մարտի 9-ին տեղի կունենա Եվրոպա լիգայի 1/8 եզրափակչի առաջին հանդիպումը «Ռոստովի» հետ: Խաղից առաջ «Մանչեսթեր Յունայթեդի» գլխավոր մարզիչ Ժոզե Մոուրինյուն մտահոգություն է հայտնել, ասելով, չգիտի` հնարավոր է արդյո՞ք խաղալ այդ խոտածածկույթի վրա։ Այս մասին տեղեկացնում է Чемпионат. Com-ը։
«Մանչեսթեր Յունայթեդի» գլխավոր մարզիչը նախախաղային մամուլի ասուլիսի ընթացքում նաև խոսել է Հայաստանի ազգային հավաքականի կիսապաշտպան Հենրիխ Մխիթարյանի՝ դաշտ դուրս գալու հավանականության մասին։
«Չգիտեմ՝ ինչ կազմով և ինչպես պետք է վաղը խաղանք: Չգիտեմ՝ արդյոք Մխիթարյանը կխաղա՞, թե՞՝ ոչ»,-ասել է նա:
Մոուրինյուն նշել է, որ ինքն հույս ուներ, որ իրենք կխաղան համապատասխան պայմաններում: Նրա խոսքով` նման իրավիճակ է եղել նաև Չինաստանում, որտեղ նրանք հրաժարվել են խաղալ:
«Բայց, երևում է, վաղը մենք ստիպված կլինենք խաղադաշտ դուրս գալ և խաղալ»,- նշել է Մոուրինյուն։
Կողմերը համաձայնության են եկել նախախաղային մարզում չանցկացնել «Օլիմպ-2»-ի գլխավոր դաշտում՝ խոտածածկը չվնասելու համար:
