ԵՐԵՎԱՆ, 5 մարտի — Sputnik. Ադրբեջանին հետաքրքրել են Պակիստանի զենքի ցածր գները, Sputnik Արմենիային ասաց ՀՀ պաշտպանության նախկին նախարար Վաղարշակ Հարությունյանը:
Ավելի վաղ Ադրբեջանի նախագահ Իլհամ Ալիևը Իսլամաբադում Պակիստանի վարչապետ Նավազ Շարիֆոմոբի հետ պայմանավորվածություն էր ձեռք բերել՝ սպառազինություն ներկրելու վերաբերյալ:
Պաշտպանության նախկին նախարարին չի զարմացնում այն փաստը, որ Ադրբեջանը որոշել է զենք գնել Պակիստանից:
«Ադրբեջանին կարող է հետաքրքրել ոչ միայն Պակիստանը, այլև այն երկրները, որոնք զենք են մատակարարում Իսլամաբադ», — ասաց Հարությունյանը:
Նրա խոսքով` պետությունները հաճախ փորձում են զենքը վաճառել երրորդ երկրների, այս պարագայում` Պակիստանի միջոցով, որի բանակի սպառազինությունը հիմնականում համալրված է արևմտյան զինատեսակներով:
«Պակիստանն ինքն էլ է զենք արտադրում, սակայն դրա որակն այնքան էլ բարձր չէ», — ասաց Հարությունյանն՝ ավելացնելով, որ այդ զենքը զիջում է ռուսական և իսրայելական զենքին:
Այլ հարց է, որ Պակիստանի զենքի գները, անորակ լինելու հետ մեկտեղ, ավելի ցածր են ռուսականից: Ադրբեջանին կարող է շահագրգռել հենց այս փաստը: Հարությունյանը նշում է, որ այս իրավիճակում կարևոր է իմանալ, թե Բաքուն ինչ զենք է մտադիր ձեռք բերել և ինչ գնով:
Նա ընդգծեց, որ Պակիստանն ու Թուրքիան աջակցում են Ադրբեջանին: Այս կապակցությամբ բացառված չէ, որ հայտարարությունը կարող է նույնիսկ քարոզչական բնույթ կրել:
Ավելի վաղ Ադրբեջանը բազմաթիվ անգամ խոսել է Պակիստանից տարբեր տեսակի զենք գնելու մասին, մասնավորապես, խոսքը վերաբերում էր ՄԻԳ-29-ին համարժեք համարվող JF-17 Thunder տեսակի (չինական FC-1 Xiaolong կործանիչների պակիստանյան անվանումը) ինքնաթիռներին:
