ԵՐԵՎԱՆ, 4 մարտի — Sputnik. Սարիկ Անդրեասյանի՝ խորհրդային սուպերհերոսների մասին պատմող «Պաշտպանները» ֆիլմը, որը վարձույթի է հանվել 2017թ-ի փետրվարի 27-ին, ռուս կինոքննադատների կողմից ճանաչվել է կինոյի պատմության ամենավատ ֆիլմերից մեկը: Նման հետևության է հանգել Ռուսաստանում գրախոսությունների խոշորագույն հարթակը՝ «Կրիտիկանստվոն»:
Այսպես, ռուս կինոքննադատների կազմած վատագույն ֆիլմերի վարկանիշում «Պաշտպանները» ֆիլմը ճանաչվել է 2017թ-ի ամենավատ ֆիլմը և ամբողջ պատմության մեջ չորրորդ ամենավատ ֆիլմը: Վարկանիշը կազմվել է 26 գրախոսությունների հիման վրա, որտեղ հաշվի են առնվել աղբյուրի հեղինակությունն ու պրոֆեսիոնալիզմը:
«Շատ չենք երկարացնի: Սարիկ Անդրեասյանի «Պաշտպանները» ֆիլմը վատն է: Ո՞վ էր կասկածում: Հարց է ծագում՝ որքա՞ն վատն է: Առավելագույն: Ավելի վատ, քան հնարավոր էր պատկերացնել: Մի լեգենդ կա այն մասին, որ «Պաշտպանների» լուսագրերից հետո ինչ-որ տեսարան կա: Բայց այն ոչ ոք չի տեսել, քանի որ ոչ ոքի չի հաջողվել դիմանալ մինչև ֆիլմի ավարտը», — գրում է Ալեքսեյ Լիտովչեսնկոն «Ռոսիյսկայա գազետա»-ից իր «Ослик, Суслик, Андреасян» գրախոսությունում:
«Բրիտանացի գիտնականները հայտնաբերել են նոր հիվանդություն՝ «Գլխուղեղի Անդրեասյան»: Այդ հիվանդության հերթական դրսևորումը դարձել է «Պաշտպանները» ֆիլմը, որին մենք սպասում էինք ինչպես ժողովուրդն էր սպասում Քրիստոսի հայտնվելուն, Բրեյվիկի դեմ դատավարությանը, Ատլանտիդայի հայտնաբերմանը: Մեծն Անդրեասյանի ֆիլմը էկրան է բարձրացել, և օրակարգում մեկ այլ հարց է՝ ո՞վ կպաշտպանի մեզ «Պաշտպաններից»», — գրում է մեկ այլ քննադատ:
«Կրիտիկանստվոյի» կայքում հավաքված գրեթե բոլոր գրախոսությունները գրված են նույն ոգով՝ ոչ միայն բացասական, այլ նաև հեգնական, երբեմն էլ բացահայտ ծաղրական տոնով: Եվ «ո՞վ կպաշտպանի ռուսական կինեմատոգրաֆը «Պաշտպաններից» հռետորական հարցը կարմիր թելով անցնում է գրեթե բոլոր գրախոսություններով:
