ԵՐԵՎԱՆ, 3 մարտի — Sputnik. Ռուսաստանը մշտական հսկողության տակ է պահում ղարաբաղյան հակամարտության հարցը։ Այս մասին ասել է Ռուսաստանի Դաշնության Դաշնային ժողովի նախագահ Վյաչեսլավ Վոլոդինը ՀՀ ԱԺ խոսնակ Գալուստ Սահակյանի հետ հանդիպման ժամանակ։
«Այդ թեման մշտական հսկողության տակ է, քանի որ նման հարցերը չեն կարող չանհանգստացնել մեզ»,- ասել է նա։
ՀՀ ԱԺ նախագահի խոսքով` Հայաստանը կարևորում է Ռուսաստանի դերը Լեռնային Ղարաբաղի հիմնախնդրի կարգավորման գործընթացում` որպես Մինսկի խմբի համանախագահող երկիր: Հայաստանը մշտապես հանդես է եկել հիմնախնդրի խաղաղ կարգավորման օգտին, սակայն բախվել է Ադրբեջանի ապակառուցողական գործելաոճին:
«Չնայած Վիեննայում և Սանկտ-Պետերբուրգում ձեռք բերված պայմանավորվածություններին, Ադրբեջանն անտեսում է դրանք և շարունակում է սրել իրավիճակը շփման գծում: Հայկական կողմը կարևորում է փոխվստահության մթնոլորտի ձևավորմանն ուղղված միջոցառումների իրականացման անհրաժեշտությունը: Համոզված ենք, որ խնդրի խաղաղ կարգավորումն այլընտրանք չունի»,- իր հերթին ասել է ՀՀ ԱԺ նախագահ Գալուստ Սահակյանը:
Վյաչեսլավ Վոլոդինը, շնորհակալություն հայտնելով ջերմ ընդունելության համար, նշել է, որ ռուս և հայ ժողովուրդների միջև կապերն ունեն խոր արմատներ և ձևավորված ավանդույթներ, որոնք պետք է պահպանել և առավել ամրապնդել:
Պետական դումայի նախագահը, անդրադառնալով երկու երկրների ռազմավարական գործընկերությանն ու միջխորհրդարանական հարաբերություններին, կարևորել է միջազգային հարթակներում խորհրդարանական պատվիրակությունների համակարգված աշխատանքը:
Անդրադառնալով տարածաշրջանային խնդիրներին՝ նա նշել է, որ Ռուսաստանն անում է հնարավորը տարածաշրջանում խաղաղության պահպանման համար: Այս համատեքստում Վյաչեսլավ Վոլոդինը նշել է, որ իրենք ղարաբաղյան հակամարտության կարգավորումը տեսնում են բացառապես խաղաղ ճանապարհով՝ Մինսկի խմբի ձևաչափում:
