ԵՐԵՎԱՆ, 2 մարտի — Sputnik. Ինտերպոլի գլխավոր քարտուղարությունը մերժել է Ղարաբաղում աշխատած հայ և արտասահմանյան հնեաբանների դեմ միջազգային հետախուզում հայտարարելու վերաբերյալ Ադրբեջանի հայտը, ասվում է ՀՀ ոստիկանության մամուլի հաղորդագրությունում։
Ավելի վաղ հայտնի էր դարձել, որ Ադրբեջանի գլխավոր դատախազությունը միջազգային հետախուզում է սկսել Հայաստանի ԳԱԱ Մոլեկուլային կենսաբանության ինստիտուտի աշխատակից Լևոն Եպիսկոպոսյանի, Իսպանիայի բնական գիտությունների ազգային թանգարանի հետազոտող Իոլանդու Ֆերնանդես Խալվոյի, Մեծ Բրիտանիայի Բլենֆորդի թանգարանի աշխատակից «Ազիխյան նախագծի» ղեկավար Տանիա Քինգի և Մեծ Բրիտանիայի բնական պատմության թանգարանի աշխատակից Փեթեր Էնդրյուսի նկատմամբ:
2017թ. մարտի 1-ին Ադրբեջանում Ինտերպոլի ԱԿԲ-ի կողմից շրջաբերական էր ստացվել` հասցեագրված Ինտերպոլի անդամ-երկրներին, 2016թ.-ին ԼՂՀ տարածքում հնագիտական պեղումներ իրականացնող արտասահմանյան և ՀՀ մի խումբ գիտաշխատողների նկատմամբ միջազգային հետախուզում հայտարարելու վերաբերյալ:
Նրանց նկատմամբ հետախուզում էր հայտարարվել Ադրբեջանի քրեական օրենսգրքի 116.0.8-3 (հակամարտության ժամանակ միջազգային մարդասիրական նորմերը խախտելը), 165.2.2 (հեղինակային կամ հարակից իրավունքները խախտելը), 183.2.1 (հատուկ արժեք ունեցող առարկաներ թալանելը), 183.2.2, 281.2 (Պետության դեմ ուղղված հանրային կոչերը) և 318.02 (Ադրբեջանի Հանրապետության պետական սահմանն ապօրինի հատելը) հոդվածների հատկանիշներով»,- նշվում է հաղորդագրությունում:
Ինտերպոլի գլխավոր քարտուղարությունն իր հերթին ՀՀ ոստիկանությունից ստացված տեղեկատվությունը հիմնավոր համարելով` անհապաղ արձագանքել և համապատասխան շրջաբերական նամակով նույն օրը դիմել է Ինտերպոլի անդամ-երկրներին և տեղեկացրել, որ այդ անձանց նկատմամբ շրջանառվող տեղեկատվությունը հակասում է Ինտերպոլի կանոնադրության 3-րդ հոդվածին, և այդ անձանց նկատմամբ միջազգային հետախուզում չի կարող իրականացվել:
Երևանը համարում է, որ այս գործողությունները սպառնում են Ինտերպոլի հեղինակությանը և հակասում Կազմակերպության կանոնադրության 3-րդ հոդվածին, որում ասված է, որ «կազմակերպությանը խստիվ արգելվում է որևէ գործունեություն ծավալել կամ միջամտել քաղաքական, զինվորական, կրոնական, ռասայական բնույթ կրող գործերին և հարցերին»:
Ինտերպոլի գլխավոր քարտուղարությունը, ընդունելով ՀՀ ոստիկանությունից ստացված տեղեկատվության հիմնավոր լինելը, անհապաղ արձագանքել և նույն օրը դիմել է Ինտերպոլի անդամ-երկրներին և տեղեկացրել, որ այդ գիտնականների նկատմամբ շրջանառվող տեղեկատվությունը հակասում է Ինտերպոլի կանոնադրության 3-րդ հոդվածին, և այդ անձանց նկատմամբ միջազգային հետախուզում չի կարող իրականացվել։
