ԵՐԵՎԱՆ, 24 փետրվարի — Sputnik. Ադրբեջանի գլխավոր դատախազությունում քրեական գործ է հարուցվել մի խումբ հնագետների նկատմամբ, որոնց թվում է Իսպանիայի Բնական գիտությունների ազգային թանգարանի գիտաշխատող Յոլանդա Ֆերնանդես Խալվոն, քանի որ նա մասնակցել է Արցախի Հանրապետության Հադրութի շրջանի Ազոխի քարանձավում անցկացված պեղումներին։ Այս մասին հայտնում է noticias.terra կայքը։
Ադրբեջանի արտգործնախարարությունը վերոնշյալ հնագետներին անցյալ տարի արդեն ընդգրկել էր իր սև ցուցակում, իսկ այժմ դատախազությունն է քրեական գործ հարուցել:
Ըստ մեղադրող կողմի` գործը հարուցվել է Ադրբեջանի քրեական օրենսգրքի համաձայն, «քանի որ միջազգային արշավախումբը պեղումներ է կատարել Ազոխի քարանձավում, իսկ Բաքուն Արցախը համարում է բռնազավթված տարածք»։
Ազոխի պեղումները հաստատել են, որ այնտեղ 7000 տարի առաջ ապրած մարդիկ եղել են հայերի նախնիները:
Բաքուն համարում է, որ իսպանացի և անգլիացի հնագետները խախտել են միջազգային իրավունքը և պեղումներ անցկացրել քառորդ դար առաջ «հայերի կողմից բռնազավթված տարածքում»:
Այս ամենում մեղադրվում է Իսպանիայի ազգային Բնագիտության և պատմության թանգարանը, քանի որ գումար է տրամադրել պեղումների համար: Ըստ Բաքվի` գիտնականները սահմանը հատել են ապօրինաբար, պեղումներ կատարել Ադրբեջանի տարածքում` առանց պաշտոնական թույլտվության:
Ազոխի քարանձավը, որն ուսումնասիրվում է 1960–ականներից, մարդկության առաջին կացարաններից մեկն է համարվում Եվրասիայում։
Գիտնականները կարողացել են ապացուցել, որ այնտեղ առնվազն երկու միլիոն տարի մարդիկ են ապրել:
Այս խմբի մեջ ներգրավված հայ գիտնականները ցանկանում էին ապացուցել, որ Արցախի վիճելի տարածքը մշտապես բնակեցված է եղել էթնիկ հայերով:
