ԵՐԵՎԱՆ, 2 մարտի — Sputnik. Տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը կառավարության նիստից հետո լրագրողների հետ զրույցում անդրադարձավ Վերին Լարսի թեմային։
«Եթե Լարսին այլընտրանք եք ուզում, դա կլինի»,- ասաց Մարտիրոսյանը։
Միայն թե այստեղ ճշգրտման կարիք կա. այլընտրանք ասելով պետք չէ նկատի ունենալ միայն Հարավային Օսեթիայով անցնող ճանապարհը։
Ի դեպ, վրացական կողմի հայտարարություններից պարզ է դառնում, որ Լարսի օսական այլընտրանքը պետք չէ քննարկել, որովհետև գոնե այս ժամանակահատվածի համար այն անհնարին նախաձեռնություն է։
«Վրաստանի վարչապետն ասել է` այլընտրանք լինելու է, բայց եկեք չկենտրոնանանք միայն աբխազական երկաթուղու կամ Օսեթիայի ճանապարհի վրա։ Լաստանավը ևս այլընտրանք է»,- ասաց նախարար Մարտիրոսյանը։
Հարցին, թե արդյոք արդյունավե՞տ է գնահատում թբիլիսյան այցը, նախարարը պատասխանեց` շատ արդյունավետ։ Նա շեշտեց, որ արդյունքները տեսնելու համար ժամանակ է պահանջվում։
