ԵՐԵՎԱՆ, 28 փետրվարի — Sputnik. Զուգահեռ ներկրման կիրառումը կարող է մինչև հինգ անգամ նվազեցնել դեղերի գները ԵԱՏՄ երկրներում, Sputnik Արմենիային հայտնեցին Եվրասիական տնտեսական հանձնաժողովի մամուլի ծառայությունից:
Այս տարվա փետրվարի 28-ին Մոսկվայում կայացել է Եվրասիական տնտեսական հանձնաժողովի մրցակցության և հակամենաշնորհային կարգավորման կոլեգիայի անդամ (նախարար) Նուրլան Ալդաբերգենովի խորհրդակցությունը ԵԱՏՄ անդամ երկրների հակամենաշնորհային մարմինների ղեկավարների հետ:
«5+1» ձևաչափով հանդիպմանը մասնակցել է նաև Հայաստանի Տնտեսական մրցակցության պաշտպանության պետական հանձնաժողովի նախագահ Արտակ Շաբոյանը:
Նուրլան Ալդաբերգինովի խոսքով՝ «զուգահեռ ներկրումը» թույլ կտա ԵԱՏՄ երկրներում զգալիորեն նվազեցնել ներկրվող ապրանքներից շատերը գները. դեղամիջոցների գները կարող են նվազել մինչև 5 անգամ, ավտոպահեստամասերի, օծանելիքի և կոսմետիկայի գները` մինչև 2-3 անգամ:
Խորհրդակցության մասնակիցները նշել են, որ ԵԱՏՄ երկրների հակամենաշնորհային մարմինների և բջջային կապի օպերատորների հետ անցկացրած աշխատանքի արդյունքում զգալիորեն նվազել է ռոումինգի ծառայությունների արժեքը: Օրինակ` «Վիմպելկոմ» ընկերությունների խմբի կապի օպերատորները Հայաստանի համար («ԱրմենՏել» ՓԲԸ) սակագները նվազեցրել են մինչև 6 անգամ՝ մեկ րոպեի համար 40 ռուբլուց մինչև մեկ րոպեի համար 7 ռուբլի, իսկ Ռուսաստանի Դաշնությունում («Վիմպելկոմ»)՝ մինչև հինգ անգամ. մեկ րոպեի համար 49 ռուբլուց մինչև մեկ րոպեի համար 10 ռուբլի:
Բջջային կապի օպերատորների տվյալով՝ ԵԱՏՄ անդամ երկրների սպառողների համար միության տարածքում ռոումինգի ծառայությունների արժեքի նվազման տնտեսական արդյունքը կարող է կազմել տարեկան շուրջ 2 մլրդ ռուբլի: Հայաստանի քաղաքացիները ռոումինգում զանգերի արժեքի նվազումից կտնտեսեն տարեկան մինչև 135 մլն ռուբլի:
ԵԱՏՀ հաղորդագրության համաձայն` ռոումինգի ծառայությունների արժեքի նվազումը թույլ կտա զարգացնել տնտեսական ինտեգրումը, ապահովել տնտեսական առաջընթաց, ընդլայնել համատեղ նախագծերը տնտեսական տարբեր ոլորտներում, ինչպես նաև ավելացնել զբոսաշրջային հոսքը ԵԱՏՄ երկրների միջև:
2016թ-ին հանձնաժողովի և Դաշնային հակամենաշնորհային ծառայության, Caterpillar ընկերության և նրա դիլերների համատեղ աշխատանքի արդյունքում փոփոխություններ են կատարվել այդ ընկերության հիմնական միջազգային համաձայնագրերում, որոնք կանոնակարգում են մատակարարման հարցերը ԵԱՏՄ տարածքում:
Այսպիսով, ապահովվել են մրցակցության հավասար պայմաններ տեխնիկայի ապրանքային շուկայում, որը կիրառվում է լեռնահանքային արդյունաբերության ոլորտում Caterpillar ապրանքանիշի տեխնիկայի և պահեստամասերի սպառողների համար: Դա նշանակում է, որ ԵԱՏՄ ցանկացած երկրի սպառող կարող է գնել անհրաժեշտ տեխնիկա և ստանալ համապատասխան տեխնիկական սպասարկում ցանկացած դիլերից, ինչը լիովին համապատասխանում է Եվրամիությունում դիլերային ցանցի աշխատանքին: Արդյունքում դա ԵԱՏՄ երկրներում պետք է զգալիորեն նվազեցնի նմանօրինակ ապրանքների և սպասարկման գները:
Հանձնաժողովը շարունակում է վերլուծել լեռնահանքային արդյունաբերության համար տեխնիկայի խոշոր մատակարարների գործունեությունը, որպեսզի նրանց գործունեությունը համապատասխանի մրցակցության ընդհանուր կանոններին:
